S Africa opposition teloki Zuma Tir menden nungi anentsütsü meranger

Johannesburg, April 01 (Agencies): South Africa Tir, Jacob Zuma yimsüsütsü menden nungi anentsütsü alizüng ayuba olen ka S Africa’er tongti opposition teloki tanü, Hokolbar nü metetdaktsüogo.
Parliament yimsüsürtemi Zuma Tir menden nungi manentsüra, parnoki Zuma yimsüsütsü menden nungi anentsütsü asoshi nungdakba maparen inyaktsü renemba olen ka opposition teloki tanü sangoktsü.
Tir Zuma-i linük temzüng alema inyakba  o bendang ka S Africa nung tenteta tematiba okadaki yashi agütsüba sülen opposition teloki tanü iba olenji metetdaktsür lir.
Zuma-i par ki tajungba küma yanglushitsü maparen nung sorkar sen dollar sen million 16 shi amshiba mepyiptsütsü asoshi taoba mapang tuyuba ama meinyakba ajanga pai linük temzüng anema inyak ta shia, okadaki Zuma aitsü.
“S Africa linük temzüng aser Zuma na külemi parliament ki ka kübok melitettsü. Anungji, Zuma-i Tir menden toktsütsüla,” ta opposition telok nung densemba Democractic Alliance (DA) lenisang, Mmusi Maimane-i metetdaktsü.
“ANC teloki Zuma Tir menden nungi anentsütsü mapang tongja tongogo,” ta pai ashi.
Paisa ashiba agi, opposition teloki Zuma Tir menden nungi anentsütsü onük parliament nung yashi benok saka parliament yimsüsür timbaka Zuma-i aniba African National Congress (ANC) yimsüsürtem aliba yong parnoki benokba onüki asangsang nung matalokdaktsütsü akok.
Ajisüaka, Constitutional Court (CC)-i Zuma aitsüba sülen par ANC telok rong nung Zuma anemer adoka parnoki tarutsü mapang nung pai abenba lenisütsü menden atema tokteptsü ana nung lir.
Ano külen, national assembly-ia ozüng alema inyakba obendang ka CC-isa agütsüba sülen parliament speaker, Baleka Mbete-ia speaker menden toktsütsü takhangba DA teloki benokogo.