Tajung Samaria Guidelines yangluogo

2012 küm SaveLife Foundation ta ser NGO kati India nung Tajung Samaria nungertem kümzüka ayutsü atema PIL benokba sülen Centre sorkari iba onük asoshi mapa inyaka arur telatetba kar agi aser ibaji Supreme Court-i agizükogo. India nung gari lendongtem nung yariteper Tajung Samaria nungertem yaritsü atema Centre sorkari telatetba kar yanglubaji Supreme Court nung züngsem anati akümba bench kati taoba Bodbarnü agizükogo.  ‘Nisungtemi yirua alir dak teka agi kongshia anepaluba ajanga police-i parnok dang asüngdangya ta tsübua bilemer. Iba jagi nisungtemi police tonga maru tashi meyariteper saka idangji yirua alirtemji azü aika yimdokba ajanga taküm mekümzüktettsüsa akümer’ ta Supreme Court bench-i metetdaktsü. Gari lendong nung yaritepertem dang police, mozüki aser tanga ketdangsertemi timtem magütsütsü aser parnoki memulungra, parnok indang temetettsütem meshia mayutsü atema Good Samaritans Guidelines nung shia lir. Ano, tatalokba kar nung, parnokji osang sangoktsür dang süra, parnok okadak jaoka ken o angadangba nung medendaktsütsü aser ibala mesükba ken o nung parnok nem affidavit agütsütsü atema Guidelines nungsa shia lir. Supreme Court-i sorkar dang Good Samaritans Guidelines indang osangji yimjak nung kanga junga metetdaktsütsü atema tetuyuba agütsüogo. Supreme Court-i Guidelines agizükba ajanga Guidelines ji ozüng akümer aser police, mozüki aser tanga ketdangsertemi tetuyuba sülen anidaktsüla. India nung gari lendong atalokdang, nisungtemi police tsübuba agi yariteptsü nungnanger aser aiben lendong nung meyaritepi toktsür. Küm ishika tejaklen linük yimtiba nung tebur telok kati tetsür ka shi nung tashiyim agi raksatsüba Nirbhaya tatalokba nunga, tetsürla den lar medemer ka kanga mejungi yirur mapang talangka lenmang tezülen meyari yutsüba osang asenoki angazükogo. Iba tatalokba nung lenmang nung senzüsenbongertem tena meyari aser mapang talangka lir külen constable ka tesem tonga aruba sülen ang tena mozüki dangi anir ao. Iba aonung tetsüng agi aser gari nung senzürtemi tetsürla aser lar medemer na lenmang nung yirur longdaka alibaji angu saka parnoki tena meyari  aser süia ao. Iba mapang senzüsenbongertem jagi aria mebilemtsüba agi meyaritep asütsüa akok saka iba asoshi ozüng daka tai tongloktsütsü lir. Kechiyong aiben, India nung police-i Tajung Samaria nungertem dak tashiyim agi aser tim mesüi inyaker aser iba jagi nisungtemi item lendong nung yariteptsü tsübur. India nung gari lendongtem nung taküm samartem rongnung tesadang kabo, lendong ataloker mapang shitak nung mozüki dangi anir ao asübo taküm kümzüker lila ta telok kati asadangba nung bushitetba osang metetdaktsüogo. Yaküm May ita Ministry of Road Transports & Highways-i Good Samaritans Guidelines latet aser ano taküm January ita parnoki standard operating procedures (SOP) latetba metetdaktsü. Item ajak ya taoba additional home secretary K Skandan lenisüba kübok luden kati agütsüba osang nung ajemdaker yangluba lir. Tanü India nung Tajung Samaria nungertem kümzüka ayutsü atema ozüng yangluba ajanga gari lendong mesüra tanga lendongtsüdong balala atalokdang nisungtemi menungnangi mapang shitak nung yariteptettsü aser ibaji ajanga nisung taküm aika kümzüktsü imlar.