Atsüka aliba nungi adokang

Tsüngremi asenok ajak den kija tesendaktep liner. Yisü Khrista ajanga Pa kija Tsüngrem lir, aser asenoki meimer dang asenoki pelaba ama, Pai asenok dang pelar. Asenoki metettsü temeshitiba aser tematibaji pelaa Kibuba külembaji lir.
Iba ken nung asenoki Kibuba nung koda pelaa alitsü iba indang sayur. Mezüngbuba, kati koda Tsüngrem dang pelatsü? Jakla ajanga. Dawid dak tsüngchiba liasü(t. 20).Pa temenen nungi nüji masü liasü, saka Pa mulungjang Tsüngrem nem bendanga agütsü. Temeshiba tetezü tashi angaba(t. 21,22). Pa mulungjang nung Tsüngrem O liasü. Kodang asenoki Tsüngremi asenok nem kechi inyakdaktsüner aji Pai mulungba ama inyakdir, idangji Tsüngremi asenok dang pelar(Matt 3:17). Asenoki inyakba nung Pai pelar, asen kiyongeri asen indang bilemba nung masü.
Tanabuba, Tsüngremi shirnok dang pelar parnok dang koda inyaker? Asenoki Pa amshiba ama Pai asenok amshir (t.25-27). Asenoki aginüba ama asenok Tsüngrem anasa alir. Dawidi ajunga bendanga agütsü nung, Tsüngremi pa moatsü. Dawidi pa dang mejungi inyaker dang aochi; Tsüngremi pa dang aochi(t. 25). Dawid tsüngchir liasü; Tsüngrem pa dang tsüngchir liasü(t. 25). Dawid temerük, tila akümba aser ajemalu liasü.
Saul tekülak liasü. Tsüngremi Saul azüoktsü merang. Tsüngremi asenok azüoktsü asoshi Yakob den ama asenok den melangteper. Tanur azüoktsü asoshi tsüraburi tanurtem den melangtepba ama, Tsüngremi Pai mulungba leni asenok anir arutsü asoshi asenok den melangteper; idangji Pai asenok dang pelatsü.
Asenoki Tsüngrem dang pelaba aser Tsüngremi asenok dang pelaba koda renloktsü? Pai ne dang pelaner ta amangang; tepela aser temeshiba külemi aor. Tsüngrem nem bendanga agüjang aser Pai mulungba nung pelaa liang, saka nungnanga masü. Pai asenok nem tajungtiba agütsütsü. Kodang asenoki Pa dang peladir Pai asenok dang pelar, takümji tepelatsü akümer, aser asenoki tebu tenüng sentsüwangshitsür.
Tsüngrem dang pelaba jagi na Tsüngrem den tesendaktep sayur. Pai ne dang pelaba jagi Pai na meimba sayur. Tsüngchiba den jajaang aser Pa O angang. Pai na moatsütsü aser Pa sentsüwangshi asoshi na amshitsü.