Assam nung BJP-i sorkar tentettsü : Johny G Rengma

Dimapur, April 1 (Agencies) : Naga nunger yimsüsür aser BJP indang Scheduled Tribe Morcha tatong tir, Johny G Rengma-i Assam nung Naga nunger aliba tesemtem nung BJP atema nüboyima senzür.
Johny G Rengma-i nüboyimba sentongtem nung NDA sorkari NE state tem tsüngda mangatettep aliba onüktem bentettsü atema mapa inyakba indang osang metetdaktsür.
Tang ya pai Karbi Anglong nung Howraghat assembly constituency sema senzür aser iba mapang pai BJP candidate Joyram Engleng atema nübo yimtsür.
“Assam nung Congress-i mapang talangka sorkar ketdangsüa arur aser tang ibaji melentsüla. Nübortemi BJP nem vote agüjang aser Assam nung yimjung aser terenlok bener arutsü atema Sarbananda Sonowal nem chief minister inyakdaktsütsü ayongzüker” ta Johny G Rengma-i sentong ka nung jembidang ashi.
Centre nung NDA sorkari Assam aser tanga NE state tem nung terenlok bener arunür. NE tesem nung state tulutibaji Assam lir, anungji nenoki asen tesem nung yimjung bener arutettsü aser tesentaktep yanglutettsü, ta paisa shisem.
“Sarbananda Sonowal lenisüba kübok Assam nung BJP-i aniba teloktep sorkar kati NE state tem ajak den tesentaktep yanglutsü” ta Johny-isa metetdaktsü.
Howraghat constituency nung April 4, 2016 nü election agitsü.