Himachal Pradesh CM, Virbhadra Singh anentsütsüla: BJP

Shimla, April 02 (Agencies): India linük nung tang mezüng CBI aser Enforcement Directorate (ED)-i Chief Minister teinyaktak ka anema ochimashi ken o benokogo ta shia BJP state executive-i chief minister, Virbhadra Singh anentsütsü atema bangzüng ka renema yuogo.
State BJP-i, Singh-i pa sasa manenra pa anendaktsütsüla, ta ashi.
BJP state incharge aser national secretary, Shrikant Sharma, taoba Chief minister aser Opposition lenir, Prem Kumar Dhumal aser state party Tir, Satpal Singh Satti nungeri Hokolbarnü Shimla nung BJP state executive senden tenzükja liasü.
Iba senden nung renemba bangzüng nung, Virbhadra Singh anema ochi mashi ken o tulu benoka lir, aser CBI aser ED-i tang teinyaktak Chief Minister ka ki mita reprangbaji linük nung tang mezüng ataloker, ta shia lir.
Kasa bangzüng nung, sen crore 8 dak tema jenjang Singh indang kiojen rongsen iba ken o nung ED-i bendenlokbaji state atema maaksü tulu, ta shia lir.
State sorkar aija BJP-i ashiba agi, sorkar rongsen tim masüba nung amshia chief minister menden kümzüka ayutsü atema 2012 assembly election nung tamakok angur lenirtem board aser corporations balala nung Chairman kümdaktsü.
Kasa bangzüng nungsa, state nung ochimashiba maparen tulu lir; PWD, Irrigation den Public Health, Forest, Health, Food & Civil Supplies, Power aser  Industries department temji ochimashi inyakba tesemtem kümdaktsüogo, ta ashi.
BJP-isa, state sentsüh crore 46,000 agi neneta lir, ta ashi.
Virbhadra Singh nem tai tonglokja aliba nung ajemdaker state yimsüsütsü Congress temeten makai kümogo, anungji Singh anentsütsüla, ta parnoki takhangba agütsü.