Miami Open: Djokovic o Nishikori na tanü final asayatsü

Miami, April 02 (Agencies): Serbia nunger Novak Djokovic aser Japan nunger Kei Nishikori nati pei semifinal asaya koka tang tasayadak Miami Open tennis asayamong tebur singles final asayatsü jenjang yashi, Hokolbar nü ajangzükogo.
Tebur World No. 1, Djokovic-i ghonda 2 ser minute 5 nung points 7-6 (7/5), 6-4 ngua Beligium nunger David Goffin semifinal asaya nung tsükdaktsü.
Arishi küm 28 tain Djokovic-i tan final asaya koka America nunger Andre Agassi-i taoba mapang yangluba Miami Open takok marok asemben tashi atonga akokba otsü meneptsü alizüng yua lir.
Tan takok anguba ya Djokovic-i Miami Open asaya 15 buba atonga akoker lir.
Tan asayamong nung 6 buba jenjang abensang, Nishikori-ia points 6-3, 7-5 ngua tan asayamong nung 24 buba jenjang nung alir, Australia nunger Nick Kyrgios semifinal nung tsükdaktsü.
Nishikori-i tan mezüngsüa Miami Open asayamong final nung shilem agitsü jenjang angur lir.
Taoba mapang Grand Slam takok marok 11 tashi agizüksang, Djokovic-i 8 ben tashi ajurutepa asayadang Nishikori madak 6-2 agi takok timba ngua lir.
Ano külen, tan semifinal asaya nung tamakok ajuruaka, arishi küm 20 tain Kyrgois-i taruba Hombar nü nungi tenzüka alima asayar top-20 tarensen nung densema 2009 nungi tanü tashi nung top-20 tarensen nung densemer rong nung asayar tanübotisang akümtsü jenjang tajung nuogo.