Gangwar-i Nagaland nung Apparel And Garment Making Centre lapoktsü

Dimapur, April 5 (TYO) :  North east tesem nung mezüngbuba Apparel & Garment Making Centre aliba state ji Nagaland lir.
April 5, 2016 nü Union minister of State for Textiles (Independent charge), Santosh Kumar Gangwar-i Dimapur nung Apparel and Garment Making Centre lapoktsü. Iba centre ya 6th mile, District Industries Centre Complex, Dimapur nung lir.
Gangwar-i tongti tesemdanger o jembidang Apparel and Garment ya textile industry-i tenzükba mapatong tulu ka lir aser iba maparen nung Nagaland tetenzüker ka akümba atema kanga pelar, ta ashi.
“India sorkari Nagaland nung alirtem mapa ngudaktsütsü atema mezüngbuba mapa inyakbaji Apparel and Garment Making Centre lir. Iba ya December 1, 2014 nü Prime Minister Narendra Modi-i Nagaland nung sangokja liasü” ta paisa metetdaktsü.
Küm ka tsüngda nung Apparel Centre ya lapoktetogo aser iba centre ya Nagaland nung alir nem bendanga agütsür, ta Gangwar-isa ashi.
Nagaland sorkari teyari agütsüba atema aser ano entrepreneurs-i iba mapatong nung yaritepba atema kanga pelar, ta paisa shisem.
T.R Zeliang-i Apparel and Garment Making Centre nung hostel ka lapoktsü atema asüngdangba atema senotsü teyari agütsütsü, ta Gangwar-isa nangzük.
Union Minister-isa Kobulong, Mokokchung nung Muga P3 Basic Seed Station aser Kohima District nung NERTPS kübok Integrated Eri Silk Development Project tenzüktsü.
Gangwar-isa Nagaland nung Sericulture ajanga tajangzük tulu angutsü lenmang lir ta ashi. Iba asoshi India sorkari Nagaland nung Eri, muga aser mulberry seri projects tem nungita yaritsü ta paisa shisem.
“Eri, muga aser mulberry seri projects inyaker nisung 5000 den timba tajangzük angutsü” ta paisa metetdaktsü.
Iba sentong nung Nagaland Chief Minister, T.R Zeliang-i o jembidang, Nagaland nung units 3 lapokba ajang Naga lanurtem mapa aika angazüktsü aser entrepreneurs mongin akümtsü, ta ashi.
Apparel and Garment Making Centre Dimapur ya Northeast tesem nung mezüngbuba centre lir aser iba centre ajanga northeast nübortem dak aliba sempettem ajungkettsü aser rongsenren jenjang ajungkettsü, ta chief minister-isa metetdaktsü.
Ministry-i Nagaland nung Apparel and Garment Making Centre den ano Muga P3 basic seed station aser Integrated Eri Silk Development project tenzüktsüba atema TR Zeliang-i pelaba metetdaktsü.
Iba sentong nung Nagaland Chief Secretary, Pankaj Kumar(IAS)-i tesentepertem pela agizük aser Industries & Commerce Secretary, N. Hushili Sema(IAS)-i aküp tepela o jembi.