Myanmar nungi tajangzük

Yashi tashi Myanmar (Burma) lima ya asenok asoshi India sepaitem dang nungi jena oagi tatsüokdak tesem ka dang liasü, saka tanübo asenok rongsenren nunga tajangzük angudak asütsüsa alima tajung ka küma odagi. Ibaji yaküm küm November nung agiba election nung Aung San Suu Kyi-i aniba National League for Democracy (NLD) teloki takok tulu ngur külen sepaitemi dang küm tenem shi yimsüsüa aruba sorkar melenba ajanga bener arutsüba tajangzüktem asütsü. Atangji, tanga Naga nunger karbo oagi jenoka lir saka tamalen amato masü tangbo parnokjibo sadoksadoka lir aser Myanmar sorkar dena tangatettep nung yimten nung dena shilem agia odagi. Iba jagi asenok Nagaland nung alir Naga nungertem dang Myanmar yimten nung temelenshi tajung aruba ajanga terenlok arutsüba maparen nungi tajangzük agitettsüsa renema alitsü ajungshir. Myanmar lima ya China o India na tsüngda asünungji, tenaprongla den tesendaktep tajung alitsübaji la atema kanga tenüngdaktsü lir. Atangji, tanga China teyari medeni Myanmar merenloktetter aser India dena tesendaktep tajung melira kanga akoksatsü. Aji oda, talisa India asoshi Myanmar den tesendaktep tajung alitsübaji kanga tenüngdaktsü asünungji kin ana tsüngda atsü atsüdanga ayutsü melen gari lenmangang tesademba aser tajungba yanglutsü asoshi India sorkar sentong lir. Joko, Myanmar anüdoklen tsütsü nungi gari lenmang yangluyonga aruba mapa agi yakta Nagaland arrtsü atongtsü, anungji iba lenmangtem denji India kübok aliba lenmangtem sendakteptsü. Item lenmangtem jagi India nung alirtem Myanmar ajanga gari nung Thailand tonga otettsüsa yanglutsü. Aji oda, lenmang sademsadema yanglur, alima o alima na tsüngda nübortem oli aruli asütsüsa inyakyim temelaba kümdaktsüra, Nagaland nung alirtembo kenü nung Myanmar yimtiba Naypyidaw tonga otettsü. Iba amaji kodang India o Myanmar na tsüngda Nagaland ajanga lenmang agi tangjemdir, Naga nunger lanurtem asoshi shishilembaba maparen tapu aika nung shilem agia tajangzük agitettsü. Ibaji dang masü saka Myanmar nung tesayur, doctor, engineer aser missionary mapa inyaktsüsa lenmang tajungba aser tesademba lapoktsü. Iba anogoji tonga arudagi. Aji oda, asenok dak aketba sempet aser tashi amshia jangratema lia nübortem nem tajangzük agütsütettsü asoshi kechisarina inyak angazüktsü nüngdaker. Item nüngdakba mapatem rongnung par  oshi ashitsüla,  shishilembaba yimya metettsüla, nübortem kechi nüngdaker ta asüba nüngdak agütsütsü asoshi teti bilemtsüla aser asen kidanger limatem renloka aoba tensa tia indang angatettsüla. Joko, Myanmar tir Htin Kyaw shimba sülen ano Suu Kyi-bo linük nung tir danga temaba aser tashi tuluba asütsüsa parnok tatar hoho nung “Adviser” asütsü shimtetba jagi memenui NLD leniri bilemba ama Myanmar lima tesünep nung renloka aotsü teimla tulu lir. Aung Suu Kyi ya Myanmar tir asütsü tetemsü saka lar chirnurtem bendanger asüba agi Myanmar temzüng agi la tir asütsü memelar. Ibayongji, sepaitem rongnungi shimtetba yimsüsürtemi memulungaka NLD telok nungi adoker tatartemi la nem tir danga tuluba asütsüsa maongka agütsüogo. Myanmar tir Htin o Suu Kyi na ya class pur liasü aser Myanmar nung sepaitemi aniba yimten anema tasü itta nokdaker Suu Kyi den külem ser tasüa majem Myanmar lima nung Democracy yimsü bener arutsü asoshi nokdakertem rongnung paa ka liasü. Ibayongji, Suu Kyi-i pa shim. Iba tangatettep aser temoatsü nung NLD teloki Myanmar lima sangwatsütsü. NLD telok nung ya Naga nungertema aika adoka lir aser parnoki Nagaland nung aliba Naga nungertem den külem ser maparen aika nung onür. Iba ama putu mapang ka nung Naga nunger lanurtemi parnok nem shisa tajung agüja lenmang sayura, parnok dang nungibo asenokang tajangzükba aser temoatsü tuluba angutsü. Nagaland nung town ka lapok nung tsümartemang tajangzük tuluba angu ama, Myanmar nung democracy arunung Nagaland nung alir Naga nungerang tajangzük tuluba angutsüsa asenok dak temetetba, tonga orr reprangdangnüba, tenzüknüba, yarinüba aser inyaknüba shisatsü aser tejangraba alitsüla.