Sharon khen nung tanur 3 asor tetsü tantsütila akümer

London, April 06 (Agencies): Britain nung alir semchir 4 tetsü, arishi küm 55 tain Glam Sharon Cutt-i In vitro fertilisation (IVF) teyari agia khen nung tanur 3 tashi asoba sülen Britain ajunga nung khen nung tanur 3 asor tetsü tantsütila kümogo.
Sharon aser la tedong, Sharon den arishi küm 15 agi tanübo, Stuart Reynolds nati jabaso 2-ji Mason aser Ryan aser jala Lily jatsüogo.
“Doctor-temi küpok nung metsü 4 tashi inoktsü aser iba yongji, ni tanur ka den timba asotsü ta bilema liasü aser kü nem tanur 3 tashi asangsang nung moatsü,” ta Sharon-i pelaseta ashi.
Britain nung tentetba National Health Service (NHS)-i lendong majurudaktsütsü nükjidong nung arishi küm 42 tain ser tema tetsür nem IVF teyari magidaktsüi nokdangba yong Sharon aser Stuart nati London nung tentetba nija mozüki ka nungi IVF teyariji agiba osang jangjaogo.
Timtem kecha majurui tanur asotsü nükjidong nung Sharon-i mozükidang hopta 11 tashi amongba sülen tanur 3-ji taoba March ita 21 nü Caesarean section agia tepok nungi rangtetba osang jangjaogo.