Bihar nung yi shibangba mepelar:Rishi Kapoor

Mumbai  April 6, 2016 : Bollywood actor tejen Rishi Kapoor-i Bihar state nung Nitish Kumar-i aniba sorkari yi meshi meshia shibangba aitsüogo. Joko Bihar-i maotsü, ta pai ashi.
Bihar sorkar-i Mongulbarnü state nung joko yi khenyongi mayoktsü sangdong aser ibaji ajanga Gujarat, Manipur aser Nagaland state tem sülen Bihar-a linük nung yi mayoker state pezübuba kümogo.
Rishi-i Bodhbarnü twitter ajanga pa bilemba kar lemsatep.
“Yi shibangba ajanga state nung küm shia sen crore 3000 takoksa bener arutsütsü aser ozüng alema iba oset shibelener aika adoktsü. Alima ajak nung yi shibangtsü meranger ajisüaka meshi meshia nokdangtsü makoker anungji Bihar-a iba mejangba nungi saktsüla,” ta Rishi-i twitter ajanga ashi.
“Yi amshirtem küm 10 tepuokdak ayutsü saka ozüng alema prangpong amshirtembo küm pongu ang tepuokdak ayutsü ? Wah Nitish! Nibo joko Bihar-i marutsü! 2016 küm nai tarutsü nükla kecha mongui akümer asü ?” ta Rishi-isa ashi.
“Kapoor & Sons” film nung shilem agisang, Rishi-i, pai 1983 küm shilem agiba “Coolie” film indang noksa ka dena twitter nung lemsatep.
“Coolie film tensa nungi yi ajemtsü yimya sübaa aküm. Ajisüaka yi ajemba aser moko achiba ya taküm asoshi lendong lir. Nüburtemi item temesepba chiyungtsü nungi pila alitsüla,” ta pai Coolie noksa teküpoklen züluja lir.