NHAK-i Save A Life Pharmacy licence agiener : AYO

Kohima, April 6 (TYO) : Naga Hospital Authority Kohima (NHAK)-i Save A Life Pharmacy indang Pharmaceutical trading license meyipa agitsü aser thitsütsü telemtetba agiogo.
Iba telemtetba ya Angami Youth Organisation (AYO) aser NHAK tsüngda senden ka amendang lemtet. Save a Life Pharmacy ya NHAK nung nijai lapokba lir aser parnoki shiranger ka dang mapang süir aliba mozü ayokba ajanga iba ken o ya adok.
Hombarnü NHAK ketdangsertem den senden ka amendang parnoki metongi inyakba atema tebilemtsü khuret abentsü nangzük, ta AYO tatong tir Kekhrievolie Keyho aser tongti tezülur Rokoketou Sechü nati sangdong ka nung metetdaktsü.
Iba senden nung Save A Life Pharmacy indang Pharmaceutical trading license athitsü aser meyipa agitsü atema telemtetba agi, ta AYO mendenpurtemisa ashi.
Mozü tesüi ayokba shiranger dak mozü ajanga timtem kar dang adokra parnoki teyari agütsütsü ta NHAK ketdangsertemisa nangzük aser tarutsü nung ibala timtem majurutsü atema parnoki kanga junga mita alitsü ta metetdaktsü.
AYO-i medical mapa inyakertem dang shiranger nem mozü magütsüdang tamasa mozü yangluba aser süiba anogotem kanga junga repranger ang mozü agütsütsü nenshia metetdaktsü.
Public-ia doctor temi mozü zülutsüba dak alia tanga mozü malitsüla kechiyong Kohima jila nung mozü tajung aser ano tamajungtem kanga bulua ayoker, ta AYO-isa metetdaktsü.