IPL: Sentong renemba ama, Mumbai o Pune na tsüngda tetenzükba asaya asayatsü

Mumbai, April 07 (Agencies): Sentong renema ali ama, Mumbai Indians aser Rising Pune Supergiants telok na tsüngda 2016 Indian Premier League (IPL) cricket asayamong tetenzükba asaya tan April ita 9 nü asayatsü renemogo.
Bombay High Court-i IPL tetenzükba asaya masayadaktsütsü asoshi benokba ken o magizüktsü tanü lemtetba sülen sentong renemba ama, asayaji asayatsü renemer lir.
“Maharastra tesem aika nung nüburtemi tajemtsü tzü peria mongui timatemba mapang ka nung IPL asayadak 3 tashi nung tzü litre lakh 60 tashi shioka asayadakji anepalutsü sentong renema lir,” ta shia, NGO Loksatta Movement-i aniba telok kati okadak Public Interest Litigation (PIL) ken o benok.
Ajisüaka, India ajunga nung cricket asayatsüren ketdang asür, Board of Control for Cricket in India (BCCI)-i asayadak shioktsü tzüji nisungi mejemtetba tzü aliba aser kasaji sen agi alizüktsü renemba osang jangjashitsüba sülen Justice VM Kanade-i aniba okadak mendeni PIL ken oji magizüktsü lemteta liasü.
Okadaki tan benokba ken o den sentakba osang tejangja tan April ita 12 nü tashi nung okadak benoktsü asoshi Maharashtra sorkar tuyuba den külemi, Maharashtra nung asayatsü renemba tanüngba asayatem den sentakba telemtetba agitsü asoshi BCCI dang tuyuogo.
9 buba IPL asayamong lapokba sentong tan April ita 8 nü agiba sülen tasüng, April ita 9 nü nungi tenzüka asayamongji asayatsü.
Mumbai, Pune aser Nagpur nung asaya 20 tashi asayaba sülen Mumbai kübok Wankhede Stadium nung final asaya taruba May ita 29 nü asayatsü sentong renema lir.