Tanü nungi RMSA candidate temi lungkak aitter

Dimapur, April 07 (TYO): RMSA tatidang takok angur candidate temi April 7, 2016 nü nungi tenzüka appointment order agütsütsüla, ta State Mission Director RMSA Nagaland dang shidi ajanga mepishiogo, ta takok angur RMSAcandidate temi sangdong ka ajanga metetdaktsü.
“Tamalen appoint asüba ama posting tesemji District Wise asütsüla, kechiyong onoki kasa tatidang agüja takok angu, anungji department-i bendanga mamshitsüla,” ta kasa shidi nung parnoki shia lir.
Item takhangbatem mataloktsüra April 8 anepdang 9:00 ako nungi parnoki mapang telatet ka makai lungkak aittsü, ta metetdaktsüogo.
Secondary teachers RMSA atema advertisement ya 2013 küm Dec. 14 nü agütsü aser 2014 May 24 nü written tatidang agiba sülen 2014 June 27 nü tatidang osang sangdonga liasü. 2015 July ita Viva tatidang agiba sülen 2015 November 30 nü tatidang osang sangdong. Mezüngbuba shilempur appointment nguogo ajisüaka tanabuba aser tasembuba shilempur tang tashi appointment atadar.
“Küm tom nung mapa angutsü maongka maliba ajanga tsürabur dak dang metaloker alir, ta tangatetba nung item onüktem agütsür- appointment magütsü tashi lungkak aittsü, anogoshia tenüng ajatsü aser lungkak aitba nung shilem magirtem itasen nungi shilem 50 katitsü,” ta parnokisa metetdaktsü.
“Tamalen tanga school aser college nung inyaker candidate shirnoki, mapa tasen nguogo ta bilema pei mapa tokja liasü, ajisüaka tang tashi appointment manguba ajanga mapa makai kümogo, parnoki 2016 March 14 nü mezüng temepishibaji director nem agüja liasü, iba sülen March 28 nü pa ajurudang MD-i parnok dang April tanabuba hopta tashi atatsü metetdaktsü, aser maneni April 7 nü iba atemaji parnoki asüngdangtep, ajisüaka pai tezüluba nung onok nem telangzüba magütsü, anungji senso tajungtem aser tentettemi onok nungitdaktsüner,” ta kasa sangdong nung metetdaktsü