FIRMS teloki taoba Dimapur DC aser RO dang mepelar

Dimapur, April 07 (TYO): Dimapur district nung Indisen (akhidangbo Kashiram Ao Sector liasü) yim o Rilan yim na arr ladangba mapang, onoki memeteti onok meyong ali tuluka Rilan pur nem asazüktsüogo, anungji ibaji anogo tenet tsüngda tonga arur metongshitsütsüla ta taoba mapang Dimapur D.C liasüba Wb.Maong Aier, taoba mapang R.O liasüba Wt.Imtirenla Jamir aser LRSO liasüba John Lotha, par asem dang Frontier Integrated Ranges of Meranger & Sensoliküm (FIRMS) teloki metetdaktsüogo.
Parnok dangi osangkaket ajanga dang züluba shidi nung FIRMS teloki ashiba agi,Indisen aser Rilan yim adena orr aliba alumangtemji mangatettep aliba li ama züngshia liasü, kechiyong iba tesem nung Assam police-temi Naga nunger yim küma alirtem nem teti timtem agütsü, ajisüaka item li aser alushi ajungaji onok li lir ta parnokisa metetdaktsü.
“Indisen aser Rilan yim anaprongla Nagaland sorkari recognize asüba yim lir aser yim anaprongla ya Dimapur anülulen Block No. 10, Mauza No. 2 kübok lir,” ta FIRMS-isa metetdaktsü.
Rilan yim ya Indisen yimteni ” No Objection Certificate” agütsüba ajanga sorkari recognistion agüja lir aser onokia 2003 küm state sorkari Rilan Yan Colony atema survey map yangluba nung ajemdaker alitsü meranger. Ajisüaka, tejashitsüka, tangang nenoki “SURVEY OF NAGALAND, MAP SHOWING THE LAND FOR RECOGNITION OF RILAN VILLAGE, SURVEY SEASON 2009” kaket nung sign süa lir ta metetter aser iba map nungbo onok li hectors 13,60,733.8 shi atsünga arua enoka lir. Item li ajakjji onok temeten anema nenoki onok dang nungi rakzükba lir aser iba survey map yanglubajia onok nem kodanga mesayu aser memetetdaktsü ta FIRMS teloki Dimapur nung tamalen DC, RO aser LRSO nungertem dang mepelaba ken o ka metetdaktsü.
Taoba küm 30 tsüngda Assam policetemi timtem agütsüdang Nagaland sorkar nungi ketdangser shingaia onok kümzüktsü maru saka tangbo 2009 küm yangluba map nungbo onok lushi tuluka Rilan nunger lushi kümer sayur, ajisüaka iba map nemji onok li rakzüka moudaktsütsü ta FIRMS telokisa metetdaktsü.
“Tanü April 7 nü nungi zünga anogo tenet nü tsüngda tonga aruagi iba map-ji shitak masü ta meshitetra, khuret ajak nenoki abentsü,” ta kasa shidi nung FIRMS mendenbuba Wb.Temjen Jamir aser tongti zülur Wb.S.Manen Pongener nati metetdaktsüogo.