Lalit okatsür dangi Ravi Pujari-i taküm samatsütsü osang yok

Mumbai, Jul 27 (Agencies): Tesüiba mapang IPL nung tekolakba Lalit Modi meyong okatsür Mehmood M. Abdi dangi kiralongrar tetsüdi Ravi Pujari ajanga taküm samatsütsü osang yokba anema police den ken o benokogo, ta Hombar nü police nung ketdangser kati ashi.

Abdi-i iba tatlokba indang tezüluba ka Oshiwara police station, Mumbai nung agütsüogo aser police dang pa aser par kibong kümzüka ayutsü asoshi mepishia liasü, ta kasa ketdangser jagi tenüng meshii metetdaktsü.

Pai tezüluba agütsüba nung shia aliba agi, Pujari, ta mulung malem bilemba nisung kati Deobar nikongdang Australia nungi phone asü aser kechiba Lalit Modi pu asemer ta asüngdang. Idangji ni pa meyong okatsür asüba agi nibo kü mapa inyakerba dang, ta langzü. Ajisüaka pai Bangalore nunga okatsür ka anendaktsüogo aser iba kasaji na-a anendaktsütsü. Maneni Modi pusemra na aser ner kibong akoksatsü.

Phone nung jembisang jagi Abdi tang pa den inyakertemi par ki address aser par kibong indang kanga junga meteta lir ta ashi.

Iba nisung jagi ano khen lir phone asütsü ta ashi aser iba mapang Lalit Modi dena jembitsü, ta ashiba tezüluba nungji lir.

Abdi-i benokba ken o nung mera magidang tamasa jungjunga bushisüngdangmatsü ta police ketdangser kati shiogo.