Brussels amakertem ya ano France amaktsü tebilemba liasü

Brussels, April 10 (Agencies) : Brussels amakertem shitakba sentongbo ano France tanaben amaktsü nükjidong liasü, ajisüaka parnoki ajungbena Belgium yimtiba amaktsü lemtet, ta Deobarnü Belgium atema okatsür kati metetdaktsü.
“Item kiralongrartemi ano France tanaben amaktsü sentong liasü ajisüaka parnoki ajungbena Belgium yimtiba, Brussels amaktsü lemtetba ya bushisüngdang aika ajanga ngutetogo,” ta okatsüri sangdong ka ajanga metetdaktsüba Xinhua news agency osang ajanga metetdaktsü.
Brussels aser Paris yimtitem amakba dak sentakba nung Hokolbarnü Belgium yimtiba, Brussels nung apusang, Mohamed Abrini-i iba osang tejangja ya investigator tem dang ashi.
Mohamed Abrini ya Hokolbarnü apur parnok trok rongnungi ka lir. Parnok rongnung nisung pezü kiralongra mapa inyakba ken o nung aija lir.
Mohamed Abrini ya kiralongrar telok den külemi lokteper nüburtem amok merena tepsetba aser tepsettsü merangba inyakyim nung aitsür apu, ta kasa sangdong ajanga ashi.
Abrini-i pa ya March 22, 2016 nü Brussels tayimtsü anenba tesem amaker nisung tasembuba lir ta nangzükba osang tejangja okatsür jagisa Honibarnü metetdaktsü.
November 13, 2015 nü Paris amakdang tajemba agi nisung 130 asü aser tan March 22, 2016 nü Brussela amakdang nisung 34 asü.
Islamic State telungpurtemi iba tatalokba nung parnok teka lir ta tenüng agiogo.