Taintem asoshi dang bilemer !

Yashi Deobar anogo nung Ao arogotem nung ABAM Children’s day amongba mapang arogo shia nung tila tanurtem ya kanga temulung agüja Tsüngrem o nung indaktsütsübaji koda tongtibang ta asenok mulungjang shia nung nenshia jembir alitsü südi. Akümli nung taküm ka junga lia aotsübaji tila tanur asüdang kibong nung aser school nung sayutetba  dak tuluka keta lir. Ibayongji, alima aika nung tila tanurtem  asoshi senotsü peria endoka tangazükba tajung agütsür. Atangji, asenokia tila tanurtem anepalutsübaji kanga tongtibang ta angatetba agiang küm shia tanurtem anogo  amonger. Iba denji ano küm shia alima Sunday School anogo amonger aser deobar shia tila tanurtem sentep den külemi Sunday school agir. Ashiko, asenok taintem aika asoshi Sunday school aser child sentep nung angazükba Lai o dak alaka kidang aser tanga nung angazükbabo Lai tekong kata malitsüa akok. Aji oda, asenok tamangba nunga tera ayangdakjibo tila tanur sentep aser Sunday school agiba tesem aser mapangtem ya dang lir. Tanur kaji tain akümtsü aser pa mesüra la tain kümer külen pa mesüra la madakji Tsüngrem kibur asütsü mesüra moijing kibur asütsü. Tanü putu nung tila tanurtem agi aiür asangur kümer külen Tsüngrem masü saka moijing külemertem aika küma aoba asenoki tangashi dang angashir masü saka tangbo tangua angur. Ajisüaka, tanü asenok yimten aser arogo nung shitak inyaker amai saka mapijemi inyakba kaji taintemi taintem asoshi dang bilema sentong yanglur. Tarutsü asoshi tebilemtsüji ibaji lir. Sorkar senotsü sentong nunga higher education, rural development aser urbanization ama tenüng nung senotsü teimba endoktsü nüngdakba indang jembiba dak alaka tanurtem asoshi primary education nung temulung agüja jembiba aser senotsü endokba kangabo mangashir. Iba kasaji arogo nunga taintemi taintem anisüngzüka amentsü aser ajangzüktsü bilema sentong yangluba dak alaka aiben tanurtem asoshibo mebilemer. Tatishitsü agi, asenok arogo aika nung küm tepiyong inyaka aotsü asoshi sentong yanglu dang, taintem asoshibo sen aika lemzüker saka tanurtem asoshi lemzüktsütsübo kanga korur.  Aji oda, ashiko arogo aika nung taküm küm asoshi inyaka aotsü senotsü sentong yangludang tenla ki tasen yanglutsü atema sen arutsüba nungi 30 %, ita sen atema 20%, mission mapa atema 10 %, teintet rogo aser kijung lanurtem asoshi sentong tapu balala katsütsü atema 10 %, kiojen yanglushitsü aser oset tasen alitsü atema 10%, lanurtem atema 8 %,  office nüngdak atema 7 %, gari ka alitsü atema 3 % aser tila tanurtem asoshi 2 % lemzükja alitsüa akok. Aji oda, asenoki asen arogo nung tila tanurtem anepalutsüba dang nungibo asenok taintem amentsü tenla ki ka yanglutsübajing tenüngdakba aser gari ka alitsübajiang tongtibangba ta bilema alitsüa akok. Iba amaji asenoki shitak bilema inyaka lira asenok tarutsü arogo dang masü saka yimten aser loktiliba jenjangji lendong nung yutsür asütsü. Tanü asenok amenba tenla ki aser menden ajak ya tanü tila tanur asürtem nem yutsür aotsü. Aji oda, asenok alima nungi pilar tanü asenok amenba tenla kidang asenok amenba menden nungji tanü tila tanur asüba purtem ya tain kümer arua memenra shir amentsü ? Tanü Nagaland nung arogo tia  reprangdangra, samaba purtem kümzüktsüba nung masü mesüra tila tanurtem anepaluba mapatem nunga masü saka tenla ki yangluba aser gari aliba mapatem nungang temulung tagütsüba akümba reprangtettsü. Ibaji tarutsü putu asoshi lendong tamaitsü lir. Aji oda, asenok taintemi asenok amentsü tenla ki crore aika endoka yanglur saka tila tanurtem amentsübo takdang kata junga meyanglutsütetter. Tepelatsü kaji, tangar kin arogo kar nungbo Sunday School Building ta kanga junga yanglur angutsü. Item kidangji taintem amenba menden dang nungi tajungba yangluja lir. Item arogo nung Sunday tesayurtemjia ita sen agüja ayur aser parnoki child aser Sunday  school sentep nung audio visual amshia Projector ajanga Lai aser ken sayur. Iba jagi tanurtemi Sunday school aser child sentepi aotsü matatetter. Item tila tanurtem jagi asüng tenla ki asüngtsü aser yimten aser arogo tenzüktsü. Ibaji yimdangi arua asenoka asenok taintem asoshi dang mebilemi tila tanurtem asoshia bilema kanga temulung agüja inyaktsü  rongdak nüngdak kümogo.