Prakash Jaju-i ni atema jembiba ajakji tiyazü:Priyanka

April 14, 2016 : New Delhi nung linük Tir President Pranab Mukherjee ket nungi Padma Shri agizüktsü asoshi Bollywood actress Priyanka Chopra tang India nung arua lir. Lai cinema nung shilem kanga junga agitetba ajanga iba akhümket sempet agüja la nem tetushi agütsü. Aji dang masü saka la nem India nung civilian honour jenjang pezübuba dena lemzüktsüogo.
Priyanka Chopra osangbenertem den sensak asemba mapang taoba hopta tesüiba mapa la manager asüsang Prakash Jaju-i la otsü kar ashiba ajakji tiyazü lir, ta aitsüogo.
Priyanka ano tang amai jenjang tajung makümba mapang asemben tashi soseta asütsü merangogo, ta Prakash Jaju-i tawa olulu ka proka liasü.
Pai twitter ajanga olulu prokba sülen osangbenertemi pa tenüngsanga ashiba ajak Priyanka-i meyiptsüogo.
“Ya kanga tejashitsü ka lir. Kanga junga mebushidangi ni amokmerenba ajanga tepuokdak ayungsang nem India nunger osangbenertemi tenüngsang agütsüba ya kanga tejashitsü ka lir. Nibo iba dak sentakba nung kecha mashitsü kechiba süra pa nem tenüngsang agütsütsü kecha langa mali,” ta Priyanka Chopra-i osangbenertem dang ashi.
Jaju-i iba olulu ya Pratyusha Banerjee soseta asüba mapang proka liasü.
“Kechiba asenoki kinungbo’er tsüraburtemi mezüng meshiba aser azükba ajanga soseta asürtem indangbo mejembir ? Kidang mepelaba ajanga soseta asürtem indang kechiba mejembir ? Celebrity tem indang otsübo kanga kara meyipshishia jembitsür nung koda,” ta laisa ashi.
Pratyusha ya kechiba soseta asüar jangja memetet sür nung otsü balala jembiba atema Priyanka-i mepelar.
“Shingaia la kechiba soseta asüar memetet. Arishi küm 24 tain, Pratyusha okrongba shingaia bushidangtsü memerangdangi olulu aika jembir. Lar kibong nema akhümtsübu kecha magütsüi la anema nüngdak makaba o aika jembir,” ta actress Priyanka-i osangbenertem dang ashi.
“Kaketreju balala nung lanurtem aika soseta südar. Tangar ka atema kechiba asen taküm lalutsü ta nibo bilemer. Ni asübo ni okrongdaktsürji tama tepseterang soseta süla,” ta lai ashi.