Facebook ajanga tetsür ka tebu den ajurutep

New York, July 27 (Agencies): Seattle, USA nung tetsür ka tebu den küm talangka majurutepi pilar aliba Facebook ajanga ajurutepogo ta media ajanga metetdaktsü.
Tina Gomez-i la noksa ka Facebook nung enoktsür tebu den ajuruteptsü yariang, ta Facebook amshirtem dang mepishia liasü.
Lai Facebook nung enoktsüba noksa ngur külen tebur kati la dangi phone asü. Iba tebur jagi, nai bushiba tebuji ni lir, ta ashiba www.kirotv.com ajanga metetdaktsü.
Iba sülen tetendangba ka agiba nung paji la tebu ta jangjaogo.
July 11 nü la Vancouver-i oa iba tambusang, Ric Castellanos den tsürabur tetendangba agi, ta lai facebook ajanga lemsatepa liasü.
Pai, “Ni nütsü-a bilemteter, la tobur tajung asü, ni kanga pelar,” ta ashiba Gomez-i metetdaktsü.
Tsürabur tetendangba osangji Tina-i July 22 nü angu.
“Ni tetendangba osang nguogo!!!! Noklang nung shilem 99.99998 shitak. Kü taküm nungi talang ka samar aliba nguogo aser tang nungi ni asoshi mera tasen ka tenzüker!” ta lai Facebook ajanga lemsatepa liasü.
Ric Castellanos aser Gomez tetsü, Alice na Lodi, California nung 1977 küm ajurutepa liasü.
Gomez-i ashiba agi, tena ita anadang külemi lirbo pa Seattle nung alitsü ao.
Gomez-i la yarirtem dang tebu den ajurutepdaktsüba asoshi pelaba temaitsü iba otsü lemsatepa liasü.