China-i alima nung tulutiba radio telescope yanglutsü tenzüka lir

Beijing, July 27 (Agencies): China-i alima ajunga nung tulutiba radio telescope tembanga yanglutsü merangba osang angazükogo.
US nung tentetba National Aeronautics & Space Administration (NASA)-i par Kepler anünglak telescope amshia meimchir aliba alima mesükba alima tasen ka bushitetba sülen China-ia alima tanga nung nisung ama taküm aliba osang bushitettsü nükjidong nung par telescope ya tekaraba mapang nung tembanga yanglutsü tenzükba osang janjaogo.
March, 2011 nungi tenzüka yangluba radio telescope ya sangküm, 2016 tashi nung tembanga yanglutsü alizüng yua lir.
China’er tenemlen, Guizhou province nung yangluba telescope indang reflector telungtet meter 500 tasazük ya panel 4,450 tashi amshia yanglua lir.
Tembanga yangluba sülen FAST ta ajatsü renemba telescope ya Puerto Rico nung yangluba telungtet meter 305 tasazük tulu Arecibo Observatory den tuluba alitsü.
“Radio telescope ya nisung tenarong mesüka lir kechiyong alima aser anünglak nung adokba ola ajunga angashiaka nungdakba osangtem dang nisung tenarongi agizüker,” ta FAST telescope yangluba telok, National Astronomical Observatories, Chinese Academy of Sciences nung tongti scientist, Nan Rendong-i metetdaktsü.
“Telescope tajung aliba ajanga onoki radio osang tali tejangjaba ngutettsü aser alima poktetba otsü jangjaba den külemi, alima tanga nung taküm aliba osangtema meteta akümtsü,” ta Chinese Astronomical Society nung Director General, Wu Xiangping-ia metetdaktsü.