Maneni ni melungba ama inyaktsü: Mamata

Kolkata, April 16 (Agencies): Election Commission (EC) anema tanü West Bengal Chief Minister, Mamata Banerjee-i, lai maneni lai melungba ama jembitsü aser inyaktsü, ta ashi.
Trinamool Congress tongti Mamata-isa, EC-i police ketdangsertem transfer sütsüba ajanga lar party election jenjang meraksatsü, ta ashi.
Mamata-i election model code of conduct anema inyakogo ta EC-i la anema temetetdaktsüba ka agütsüba sülen anogo ka lir tanü Nadia district nung election senden ka nung jembidang lai, “Ni maneni ni melungba ama jembitsü aser inyaktsü. Nisung kari ni amokmerenra ni arrloktsütsü. Police ketdangsertem transfer sütsüba ajanga onok (Tranamool Congress) election jenjang meraksatsü. Amokmerenba politics nung onoki mamanger,” ta ashi.
EC-i ajungbena police ketdangsertem transfer sütsüogo, saka IC aser OC kar transfer sütsüba ajanga tanüngbatem longjemtsü. “Police ketdangsertem ajakji asen nisung,” ta lai ashi.
“Yimlibilema tashishitsü o anener state nung election timi agitettsü atema tebendang makai inyakang,” ta lai ashi.
“Bengal nung nüburtemi iba mezüngmeshi ya magizüktettsü. Election rara nung TMC nung inyaker tenet tepsetogo. Iba atemaji election commission-i kechi inyak (?)” ta lai asüngdang.
“May 19 nü election osang sangdongba sülen parnok (opposition) süngmangtsü, kechiyong parnok tebilemba mataloktsü,” ta lai ashi.
Mamata-isa, 2019 küm Lok Sabha election nung lar party-i tongibang shilem ka agitsü, ta ashi.
Lai, “Delhi-i aotsü lenmangji Bengal-i sayutsü,” ta ashi.