Congress-i Punjab nung mozü tebilemtsü anentsütsü: Rahul

Mohali (Punjab), April 16 (Agencies): Punjab nung temesepba mozü tebilemtsü anentsütsü ta shia Honibarnü Congress tatong Tir, Rahul Gandhi-i, state nung Congress sorkar tashii arura iba tebilemtsü ya ita ishika tsüngda anentsütsü, ta ashiba den külemi, tan aliba sorkari iba tebilemtsü atema meinyaker, ta aitsü.
Sangküm Punjab nung assembly election agitsü aliba atema senden ka amentsü lia Mohali nung osangbenertem den jembidang Rahul-i, “Punjab nung mozü tebilemtsü onük ya kanga tongtibang. Taoba mapang ni yangi arudang Akalis-i ni asayamenüja ibaji ashi, ajisüaka ibaji atangji. Mozü tebilemtsü onük süokba ya Punjab anema masü. Akalis-i mozü tebilemtsü onük anema kecha meinyaker, ta jembibaji Punjab anema masü,” ta ashi.
Rahul-i ashiba agi, state sorkari iba tebilemtsü sentoka yutsür.
Punjab terenlok atema Congress party-i inyaktsü, ta Rahul-i ashiba den külemi Punjab ya linük melong lir, aser akokba tashi agi state nem terenlok agütsütsüla, ta ashi.
“Tang ajurua aliba tayongzükbaji- Punjab nung aluyimer merirjang aika nem memonui sen agütsütsüla. Aluyimertemi linük ajak mesür, anungji tongtibangtibaji parnok anepalutsüla,” ta Rahul-i ashi.
“Congress party longjema lir aser onoki Punjab nem- lanurtem tarutsü atema bilemba, aluyimertem anepaluba aser industry tejen asentenshir tenzüktsüba sorkar tasen ka agütsüner,” ta paisa ashi.
Congress-i 2007 aser 2012 Punjab Assembly election nung tamakok ngua liasü, ajisüaka 2017 election nungbo parnoki takok angutsü imladar.