Ojala meli

English nung pei kin aser pei nübortemi jembiba oshi dang “mother tongue” ta ajaba ya kanga peta jatetogo ta angatetter. Atangji, koba lima koba kini jembiba oshi südirsüaka tetsüi dang masü saka tebuia dena kasasa jembir, ajisüaka kechiba pei oshi dangji “ojala meli” mesüra ” Tetsümeli” ta ajar ta shisadangtsübaji kanga tongtibang akümer. Ibaji angatet nung dang asenoki jembiba pei tetsü oshi ya koda tongtibang aji tali tajungba angatettsü. Ibaji angatettsü atema asen Ao oshi nung ‘Ojala’ ta asüba olong tetezü angatetra, iba jagi English nungertemia kodaser pei oshi dang “Tetsü Meli” (Mother tongue) ta jatetar, ibaji angatettsü. Alima nung o poktetba ya tesüngmangtsüka aser ano tesüngmangtsü kaji olong jatetba shiaji tetezü lir. Aji oda, Ao oshi nung mongin aser teshisadangertemi ashiba agi, ‘Ojala’ tetezü ‘ O jatetla’. Tetezü tebui masü saka tetsüi dang mezüng tanurtem dang la meli agi o jateta sayur. Aji oda, tanur mama yongdakja anepalu tenzükdang, tetsüi pei chir dang la meli agi o balala jateta sayu tenzükba agi English agia ‘Mother Tongue’ ta jatet südi ta angatetter. Aji oda, tetsü meli agidang tanurtem alimai arur külen mezüng pei oshi jembitsü sayur süra alima nung oshi sayur tesayur tulutibaji tetsü asütsü. Tetsüi dang, la meli agi tamasa pei tanur dang oja aser oba ta ajatsü sayuba nungi tenzüka pei oshi jembitsü tanurtem dang sayuba agi tanurtemi o jembi shia akümer. Iba jagi kin ka oshi renlokdaktsütsü aser ajungketa akümketa jembidaktsütsübaji kibong shi nung tebu dak masü tetsü dak tuluka keta lir. Aji oda, pei tetsü oshi angazükbaren nungbo kibongji kaketreju aser iba kaketreju nung tesayur (professor)-ji Ojalaji lir. Alima nung ya kechisarina yanglutettsüa akok saka kin ka ajungai jembitsüsa oshibo meyanglutettsü. Anungji, kodang kin ka oshi samadir, ibajibo kodanga shingaia tanaben meyanglutettsü. Iba kasaji tanü alima nung oshi karbo samaogo aser kar samatsü ana nung lir. Aji oda, tanü amaisa asenoka pei oshi jembitsü mejangrai aküm nungbo ashiko taruba putu 22nd aser 23rd centuary nungbo alima nung Ao oshi jembir malitsüa akok. Tanü asenok ajaki shisabolua bilemtsüba khuretji aji ka asütsü. Ibayongji, Ao Senden Literature Board (ASLB)-ia Ao oshi mesamai renlokdaktsütsü asoshi tangsa temerangba inyakdagi aser asenok tsüraburtemia tanurtem dang pei oshi sayutsübaji temulung tagütsüba kümogo. Taoba küm ishika asenoki asen tetsü oshi sayutsü, angazüktsü aser jembitsübaji tongtibang masü ama bilem saka tanübo asenok tashitemetet aser tangatetba ulushia akümdang, asenoki asenoksasa asen tetsü oshi jembi ashitsübaji kanga tongtibanga ta angateta aruba mapangji tang ya lir. Joko, asenoki angateta aküm nungji, tanübo asenok kinunger aser medemertem shirnokisa Ao jembi mashi, parnok mulung nung tesasaba tulu lir, kechiyong parnokji pei tsürabur yimtaki aotsüba lenmang nung apu raksar moutet timtemer amai kümogo. Atangji, tetsü oshi pei tanurtem nem sapua jembidaktsütsübaji tebutem asoshia khuret lir, saka ano tebutem dang nungibo O jatetla tetsütemang khuret tuluba asütsü. Iba khuret aser mapaji angateta Aotsür ajaki pei chirnurtem nem kechisüdir süaka Ao oshi jembidaktsütsüsa sayutsüla. Tanü tsüraburtemi tanurtem rongnung tendangtsüba (survey agitsüba) mapa ka lir.  Aji, Aotsür Aor tanurtem rongnung Ao oshi jembitetter o mejembitetter na tsüngda pei tsürabur anepaluba aser pei lima meimba jenjang medemdangang. Tanurtem rongnungji kidang kibong nung Ao mashi English mesüra Nagamese jembirtem dang nungibo Ao oshi jembirtemiang pei tsürabur temeimba aser anepaluba tasüba angutsü. Aji oda, pei tetsü oshi mejembitettertem dang nungi pei tetsü oshi jembitettertemi pei lima aser pei nübortem temeimba asütsü. Aji oda, pei tsürabur aser pei lima meimba senso agi asen lima sünga adokdaktsütsüsa, talisa, Ojala nungertemi pei meli agi pei chirnurtem dang pei tetsü oshi, Ao oshi, kanga temulung agüja sayutsü putu mapang agi akanger.