Syria Opposition-i UN-i benokba onük magizüker

Geneva, April 16 (Agencies): Syria sorkar anemertemi United Nations (UN)-i benokba onük magizükba osang ka AFP news agency-i tanü, Honibar nü sangoktsüogo.
Tan Switzerland kübok Geneva nung temendak Syria yimjung senden ketdang asür, UN ketdangsertemi Bashar al-Assad nem Syria Tir menden maneni bendaktsütsü aser sorkar anemer telok nungi deputy 3 tashi shimsema, parnoki Syria madak yimsü südaktsütsü onük benok saka Assad-i aniba Syria sorkar anemertemi iba onükji magizükba osang jangjaogo.
Syria nung sorkar tasenba metentet tashi Assad aser pa kübok sorkar anemertemi shimba Tatong Tir 3-i Syria’er yimsüsütsüren abentsü onükji UN-i shimba Syria’er Special Envoy, Staffan de Mistura-i Syria sorkar anemer tongti telok, High Negotiations Committee (HNC) den benoka liasü.
“Ozü telok nungi shimba Tatong Tir 3 nem mitkar aser yimtenren tashi agütsü aser Assad-i tenüng agi Syria Tir menden abentsü asoshi Mistura-i onük benok saka ozü teloki iba onükji magizüktsü lemtetogo,” ta HNC teloki osang jangjashitsü.
Küm 5 tejaklen nungi tenzüka Syria nung tongpang rarabaren anentsütsü nükjidong nung HNC aser Syria sorkar telok nati Geneva nung tan senden amenba osang angazükogo.
UN-i iba senden ya ayonga amener lir aser par tenteti Syria nung yimtenren temelenshi agitsü, linük temzüng tasen latettsü aser taruba 2017 küm September ita tashi nung parliamentary aser Tir election agia sorkar tasen tentettsü asoshi onük benoka lir.
2011 küm March ita nungi tenzüka Syria sorkar anema nokdakertemi Assad Tir menden nungi anentsütsü takhangba benoka lir saka Damascus-i Assad Tir menden nungi anentsü onükji magizüki lir.