US Defense Secretary, Ashton Carter-i Middle East semdanger

US Defense Secretary, Ashton Carter (Abelen)-i United Arab Emirates Crown Prince, Mohammed Bin Zayed Al Nahyan den Abu Dhabi yimti nung ajurutepdang agiba noksa yangi angur. (Abu Dhabi, April 16)

Abu Dhabi, April 16 (Agencies): US Secretary of Defense, Ashton Carter-i Middle East semdangtsü maparen tenzüka, United Arab Emirates (UAE) yimtiba, Abu Dhabi tanü, Honibar nü tonga ogo.
Syria aser Iraq na densema, alima tesem balala nung lendongtsüdong kanga sashia atalokdaktsüba kiralongrar telok tetsüti, Islamic State (IS) anema raratsü den sentakba onük benoka jembitsü nükjidong nung Carter-i tan Middle East semdangtsü tenzüker lir.
Carter-i tanü Abu Dhabi tonga aoba sülen UAE Crown Prince, Mohammed Bin Zayed Al Nahyan den ajurutepa senden ka mena liasü.
Pai maneni Al-Dhafra Air Base semdanga, UAE-i yokba US Ambassador, Barbara Leaf; Defense Attache, Brigadier-General Joe Rank aser Wing Vice Commander, Colonel Johnny Barnes nunger den ajurutepba osanga jangjaogo.
US-i aniba alima teloktep mitkartemi Al-Dhafra Air Base ya amshia, IS telok anema raratsü aser par telok den sentakba osangtsüsang agitsü maparen inyaker.
Carter-i tan Middle East semdangdang pai Saudi Arabia yimtiba, Riyadh-a semdanga Gulf Cooperation Council (GCC) defense lenirtem den senden amentsü sentong renema lir.
US Tir, Barack Obama-ia Carter den külemi Riyadh semdanga, IS teloki raksatsüba ki o jen tanaben yanglushitsü maparen nung par US-i Saudi sorkar den yariteptsü tenangzükba olen metetdaktsütsü sentong renemba osang angazükogo.
Ano, Carter-i GCC lenirtem den ajurutepdang parnok ajungai aroki lungjemer IS telok makdoktsü onük benoktsü tebilemba aliba osang metetdaktsüogo.