Sony Dwi Kuncoro Singapore Open final-i iogo

Singapore, April 16 (Agencies): Indonesia nunger Sony Dwi Kuncoro-i China nunger Lin Dan madak takok ngua tang tasayadak Singapore Open badminton asayamong tebur singles  final asayatsü jenjang tanü, Honibar nü nguogo.
Külem sensopur, Chen Long mamangtsüsa quarterfinal asaya nung tsükba sülen taoba mapang Olympic badminton champion anaben tashi akümtsü jenjang angusang, Lin-i par China nem takok bener arutsütsü ta imla liasü saka pai tanü tamakok ajurur lir.
World No. 56, Sony-i points 21-10 17-21 22-20 ngua tan asayamong nung tanabuba jenjang abensang, Lin madak takok ngua liasü.
2004 Olympic bronze medallist, Sony-i South Korea nunger Son Wan Ho den final nung ajuruteptsü.
Ano külen, Thailand tsür, Ratchanok Intanon-ia Japan tsür, Akane Yamaguchi madak semifinal asaya koka tetsür singles final asayatsü jenjang ajangzükba osang jangjaogo.
Tan asayamong nung 3 buba jenjang nung alila, Intanon-i tanü points 21-12, 22-20 ngua tan asayamong nung 8 buba jenjang abener, Yamaguchi madak takok angu.
Intanon-i China tsür, Sun Yu den final nung ajuruteptsü.