Nagaland nung June 1, 2016 nungi NFSA tenzüktsü: Paswan

Dimapur, April 16 (TYO): Nagaland state nung June 1, 2016 nungi National Food Security Act (NFSA) mapa küma tenzüktsü, ta Union Minister for Consumer Affairs, Food & Public Distribution, Ram Vilas Paswan-i Honibarnü metetdaktsü.
Tanü Police Guest House Chumukedima, Dimapur nung osangbener den sensaksemdang Paswan-i ashiba agi, yashi pai Nagaland chief minister, T.R Zeliang den ghonda ana shi sensaksemdang NFSA mapa küma tenzüktsü atema onüktem benoka lemsatep.
Nagaland nung NFSA ji shilem balala lemsar tenzüktsü aser mezüngji June 1, 2016 nü Kohima aser Dimapur district tem tenzüktsü aser July 1, 2016 nungi district ajak nung tenzüktsü, ta Union Minister-isa ashi.
State sorkari iba Act mapa küma tenzüktsü atema teinyaktsü ajak inyaktsü nangzükogo. Ration Cards tasentem menüngdar aser jangotsü online ajanga lemtsüba mapa tenzüktsü, ta Paswan-isa shisem.
Nagaland nung AADHAR maparen noklang nung shilem 65 shi tuogo aser kobi melii Aadhar den Ration Cards sendakteptsü, ibaji ajanga tim masüba inyakyim noktangtsü aser Public Distribution System nung ochishia mapa inyaktettsü, ta Union Minister-isa metetdaktsü.
Nagaland ya jang chiyungba state ka lir anungji wheat melena jang ang talila lemzüktsü nung koma, ta osangbeneri asüngdangdang, state sorkari dang mepishira Centre sorkari ibaji agizüktsü mulunga lir, ta Paswan-i langzü.
Paswan-isa ashiba agi, state sorkari mepishiba sülen sen crore 700 den timba Nagaland Hill Transport subsidy meshiba onük reprangshimtsü atema special task force ka tentetogo.
Iba Committee yagi July 30, 2016 tashi nung tesüiba küm 20 indang bills/claims dak sendakba report agütsütsü. Special Task Force nung state sorkar, Food Corporation of India aser India sorkar nungi ketdangsertem adentsü, ta paisa metetdaktsü.
Paswan ya Lok Janshakti Party nung Tir lir aser yashi Nagaland nungi party worker 150 den timbai pa den ajurutepba atema kanga pelaba ashi.
“Lok Janshakti Party (LJP) ya northeast nung nüngtugu telok ka lir aser Nagaland nunga LJP jenjang tajungba küma odaktsünür. October 2016 nung ni Dimapur semdangtsü aser Lok Janshakti Rally nung shilem agitsü lemtetogo,” ta Paswan-isa osangbener dang ashi.