NE nung rara ajema akümer

Shillong (Meghalaya), April 16 (Agencies): Tesüiba küm ishika tsüngda Northeast state tem nung rara kanga ajema kümogo, ta Union ministry of Home Affairs osang ka ajanga ashi.
Home Affairs ministry indang annual report 2015-16 nung ministry-i ashiba agi, Northeast nung 2007 küm rara tatalokba 1,489 aliba nungi 2015 küm nungbo tatalokba 574 dang liasü.
Ajisüaka Assam, Manipur, Nagaland aser Meghalaya state tem nung maneni telungpur dak sentakba tatalokbatem lir, ta ministry-i metetdaktsü.
“Tripura, Mizoram aser Sikkim tesünep nung lir. Arunachal Pradesh nung tatalokba kar dak alaka tensa süngjema lir,” ta kasa osang nungsa shia lir.
Kasa osang ajanga ashiba agi, 2007 küm security sepai 79 asü aser 2015 küm 49 asü. Iba den kasa 2007 küm civilian 498 asü aser 2015 küm nungbo civilian 46 dang asü.
State sasep nung 2010 küm nungi Assam nung kümshia tensa tajungba akümer.
2015 küm Assam nung tatalokba 81 nung telungpur 645 apu aser 49 tepset. Security sepai kata masü, civilian tuku asü aser nisung 27 apu.
Meghalaya nung 2009 küm nungi Garo National Liberation Army (GNLA) temi Garo Hills district pongu aser West Khasi Hills tesemtem nung timtem agütsür, ta kasa osang nung shia lir.
“GNLA-i dokan kibur, shishilembar aser nagmati shishilembartem dang nungi sen akhanger aseer Meghalaya, Garo Hills nung Ulfa (I) aser NSCN (I-M)-a lir,” ta MHA osang nungsa shia lir.
Centre-i GNLA den ken o mejembitsü lemtetogo, saka iba telok anema apusotsü, ta ministry-i ashi.
Yaküm Meghalaya nung tatalokba 123 nung telungpur 121 apu aser 25 tepset. Item tatalokbatem nung security sepai tenet den civilian 12 asü aser nisung 87 apu.
Manipur nung tatalokba 229 nung telungpur 805 apu aser 41 tepset. Yaküm security sepai 24 aser civilian 15 asü.
Kasa osang ajanga ashiba agi, Nagaland nung tatalokbatemji tongtibangsüa telok balala tsüngda raraba liasü. Nagaland nung tatalokba 102 nung telungpur 268 apu aser 29 tepset. Iba den külemi security sepai 9 aser civilian 9 asü. Kasa mapang nung nisung 78 apu.