Centre-i JK-i sepai tali yoksemogo

New Delhi/Srinagar, April 16 (Agencies): Taoba anogo pezü tashi Jammu & Kashmir nung tensa mesüngjemteti aliba atema tebilemtsü kaa Honibarnü Centre sorkari paramilitary sepai 3,600 tali yoksemtsü lemtetogo, iba den külemi state sorkar dang joko nisung masütsü atema inyakang, ta shiogo.
Tanü temaba jenjang nung senden ka amendang J&K tensa süoka jembiba sülen sepai tali yoksemtsü atema telemtetba agi.
Mongolbar nungi tenzüka lungkak aitdang security sepaitemi injang yokba ajanga nisung pongu asüba sülen nungi Kashmir tesem kar nung anogo pezünü tashi curfew benoka lir.
J&K nung nisung asüba atema Centre sorkari tebilemtsü akar, ta home ministry otongdar kati ashi.
Union home secretary repsema abensang Finance secretary, Ratan P Watal mendenbuba ser agiba senden nung Intelligence Bureau, Defence ministry, Central armed police forces aser ministry of home affairs nungi tongti ketdangsertem dena liasü.
Iba senden nung Kashmir Valley tensa aser J&K sorkari tensa azüoka joko nisung masütsü atema inyaktsü jembi, ta Ratan-i ashi.
Tanü paramilitary sepai company 12 state dangi yokogo aser asüng tashi nung company 24 atongtsü. Company ka nung sepai 100 shi lir.
Home ministry-i J&K ketdangsertem den maneni tongtepratepa tensa reprangdar. State nung tensa süngjemtsü atema Centre-i akokba tashi state sorkar yaritsü ta shiogo.
Handwara jila nung sepai kati tetsür ka dak tim mesüi benshi ta tai tonglokja lungkak aitdang army injang agi nisung asem asü. Iba sülen police-i injang yokdang nisung ana kahset.