Tesayurtem jungdaktsütsüla

Tanü asenoki Nagaland nung government school mejungi küma aoba angur. Ibaji asenoki repranga lia asen chirnurtem mejungi küma aoba den kasa lir. Aji oda, kasa Nagaland nung küm 50 jakdangbo government school-temsa tajungba liasü ser nung kechiba tanübo majunger ta bilemdanga asen lima nung government school yanglushitsü tenzüktsübaji kanga tongtibang kümogo. Atangji, yanglushitsü tenzüktsübajibo yutsür tanü Nagaland School Education department indang otsü kecha tajung mangashir. Ibaji asenok ajak asoshi taaktsüka lir. Iba ama tia ka nung Nagaland School Education department ya mali ama kümer tasen tenzüker ama tenzüktsüsa kümogo. Iba teyanglushiba mapa tenzüktsüba ya tsünglanglen nungi masü saka temalen nungi tenzük nung dang yanglushitettsü. Anungji, Nagaland nung government school-tem tajungba kümnüra tamasa School Eduication minister tangatetba aser mapa na prongla tajungba küma melenshitsüla. School Education minister-i lokti senden nung school tajungba kümdaktsütsü asoshi jembiba ama mapa agi inyaktsüla. Aji oda, School Education minister-i School-tem tajungba küma yanglushitsü asoshi jembiaka, school-tem nung tesayur abensaa meyoktetra aser school tanurtem nem tazüngtsü kaket school tenzüker ita ana asem tashi nunga magütsütetra, pai jembiba kija agibo school majungtsü. Atangji, Kohima nung officers ajak tesem tajung ka nung sendendaktsür tajungshi o ashitsübaji tasak masü saka shitak school ajungtsü atema pai anir officer-tem ajakji school tonga-tonga oagi inyaktsüla. Aji oda, Nagaland nung government school-tem mejungra School Education Secretary aser Director na pronglai tena kübok aliba ketdangsertem aser tesayurtem nungi shisa agitepa ajungshiteptsüla aser school-tem ajak tonga oagi anepalutsüla. Government school-tem anepalua chirnurtem tajung kümdaktsütsü asoshi School Education department nung Secretary aser Director nati anir ketdangsertem peria shima lir aser parnok nem taa shitak agüja ayur. Ajisüaka, parnoki mapa shitak meinyaktetra, parnok nem school-tem anepalutsü asoshi ita sen agütsüa malang kümogo ta parnoksasa apijemtsüla. Atangji, school-tem majungbaji tesayur majungba agi majunger, anungji tesayurtem jungdaktsütsüsa inyaktsübaji mezüngbuba teinyaktsü kümogo. Iba maparen nung yangi tamalen shisema aliba ama minister, Secretary aser Director par asemi tenzüka inyaktsüla. Par asem den ketdangsertemi tesayurtem nem pei lima meima school nung tanurtem tajung kümdaktsütsü asoshi bendanga agüja sayutsü asoshi tangatetba aser temulungtetba shisatsü agütsütettsüla. Par asemi tesayur tajungtem nem parnok mapa yari tenüngsang agütsütsüla aser tesayur tamajung aser tashi mangartem nembo temerenshi agütsütettsüla. Aji oda, mapang shia tesayurtem shisatsü renloktsü asoshi bendangleni yoktsüla aser putu den apet tesayuba tasen tasen agüja tajungba-tajungba kümdaktsütsüla. Ano, tongtibang kaji tesayurtem mulungjang memenendaktsüi aser tanga nüngdak nung mapang kanga meindoki school tanurtem sayutsü asoshi temulung tali agütsüdaktsütsü nükjidong nung electoral roll aser census ama yangluba mapatem nung parnok mamshitsüla. Ibaji dang masü saka tesayurtemi linüdak tesem apia masü saka tesayurtem nüngdakba tesem nung tesayurtem ayutsüla. Iba tashiji anepalur school-temjisa majung nungbo minister, secretary aser director dang masü saka tesayurtema ajak mapa nungi anener, School Education department ajunga private dang ayokang tajungba aser tajangzük tuluba asütsü.