Nuklutoshi, KPC nungertemi asür LL Yaden’er kibong den asüku lemsateper

Dimapur, July 27 (TYO) : Tetemjen IAS ketdangser aser Aor rongnung mezüngpur, LL Yaden alima nungi pila aoba atema temulung züreper, ta Minister Nuklutoshi-i sangdong ka ajanga metetdaktsü.
Pa akümli toktsür aobaji Naga nunger asoshi takoksa ulura aser asen lokti nung taküm bendanga agüja inyaker ka akoksaogo. Tanü lanurtemi asen lennir asür LL Yaden-i inyakba mapa tajungtem ajizüka benshitsüla, Nuklutoshi-i sangdong nung shia lir.
Pa aser par kibongi asür kibong den mangyim jashi lemsateper aser Tsüngremi asüku mapang kibong nem anisüngzük agüjang ta sarasademtsür, ta Nuklutoshi-isa shisemogo.
Ano, Kohima Press Club (KPC)-ia sangdong ka ajanga July 26 nü Dimapur nung Nagaland Post yimozülur Geoffrey Yaden tebu LL Yaden alima nungi pila aoba osang angashia mepelar aser par kibong den mangyim jashi lemsateper, ta metetdaktsü.
Asür LL Yaden ya Naga nunger rongnung shisashir aser ketdangser mezüngpur ka liasü aser pai Naga lokti ajungketttsü aser renloktsü atema mapa jenti inyakogo. Pa iba alima nungi pila aobaji asen lokti asoshi takoksa ulura lir, ta KPC tongti tezülur Alice Yhoshü-i sangdong nung shia lir.