Japan menoknok nung asür nisung 41 jungogo

Tokyo, April 17 (Agencies) : Japan anüolentip tsütsü Kyushu asetkong nung menoknok tesashi (7.3 Richter Scale) ka anokba lendong ajanga tang tashi nung nisung 41 süogo.
Brihostibarnü Kumamoto tesem nung menoknok tesashi ka anokba sülen Honibarnü iba asetkong nung anok. Menoknok anokba mapang aser anokzüker sülen nisung meyirjang aika yirur lir, ta Xinhua news agency osang ajanga ashi.
Sorkar aser tzü mopung takzürtemi Deobarnü anogo tepiyong mopung tesashi ona tzünglu tesashi alutsü ta metetdaktsüogo aser iba den külemi Japan nung Meteorological Agency temia iba asetkong nung ano terara anokshitsü aser anentsü alutsü ta takzüteta lir.
Item tasem aser tanga tesemtem ajak nung menoknok agi teraksa tulu bentsür aruba sülen ano tsüngsang mopunga kanga mejungi arutsü, ta parnoki ashi.
Ki jirepba aika nung ano nisung anenbanga lir anungji kodang ajakji ngua agitetdir tasürji tang dang nungi kanga agi timba akümtsü.
Tang tashi nung iba lendong nung yirur parnok nisung 2,000 dak tema nem mozü kidang nungi teyari agütsüogo, ta Deobarnü nüburtem atema otangdar telok NHK-i ashi.
Menoknok agi kanga sashi-a kongshiba tesem Kumamoto nungi aonung ka nung nisung 90,000 shi lendong tesem nungi aniena liasü.
Honibarnü anokba menoknok ya tan anokba menoknok ajak dang tesashiba liasü, ta meteorological agency sangdong ka ajanga ashi. Brihostibarnü anokba menoknok ji 6.5 magnitude liasü.
Japan Ato Kilonser Shinzo Abe-i, “Iba lendong ajanga yirur alirtem, aonung ka tepiyong tejenokdak semtu nung kanga timtemtepogo anungji parnok nem chiyungtsü, mozü aser tzü tajemtsü peria agütsütsü,” ta Deobarnü ashi.
Abe-i, “Tang tejenokdak semtu nung alirtem taküm jenjang tajungba kümdaktsütsü aser iba semtu nung talangka metoktsütsü sorkar tebilemba lir,” ta ashi.
Pai, “Anogo balala nung menoknok tesashi anokba ajanga teraksa aser takoksa tulu bentsür aruogo. Item menoknok ajanga kibong 450,000 shi nung electricity mali kümdaktsüogo kechiba süra iba lendong sülen tsünglu aser mopung tesashi agi item tesemtem nung kongshi,” ta shisem.
Kumamoto tayimtsü anenba tesem nungi tayimtsü jajaba khen atema anena lir aser Kyushu tesem nung jajaba Shinkansen bullet train-a mejajadaktsüi sota lir.
Lemang tesem aika nung ali paksaba ajanga gari lenmangtema aika shibanga lir.