KEC-i Kumlong ward nung merükmeju mapa inyak

Dimapur, April 18 (TYO) : April 25 nü World Malaria Day amungtsü aliba tenüng nung Kumlong Environment Committee-i April 16, 2016 nü kiyong nung merükmejuba mapa inyak.
Iba mapa nung Kumlong ward nungi club 7 züngsemtemi shilem agi aser parnoki lenmang nung ongken alibatem tokbang, kilentzü ayimdak merüktet aser merükmejuba indang tezülubatem yutsü. Iba mapa ya Swachh Bharat Ahbiyan nung aser Mokokchung jila nung SBA committee-i ayongzükba tetoktepba nung shilem ka liasü.
Kumlong Environment Committee (KEC) ya 2012 nung Kumlong Ward council-i tenzük. KEC-i mapa aika inyakbatem rongnung jana endokdak yangluba aser lokti nübodoka mapa inyakba sentongtem ayongzükba dena lir.
2014 küm ketdangsertemi Mokokchung nung Kumlong Ward nem ward temerüktiba sempet agüja liasü.
April 16, 2016 nü merükmeju mapa inyakba nung shilem tajung agiba atema Kumlong Environment Committee chairman, Kilangsashi Aier-i club 7 dang pelaba metetdaktsü.
Iba mesükba merükmeju mapa yasera ayongzüka agitsü aser item sentong nung sensotemi arua yaritepdaktsünür, ta paisa shisem.