Mokokchung nung Dr. Ambedkar asoba anogo den NPD amung

Dr Ambedkar asoba anogomung den repsema NPD sentong nung Mkg DC Sushil Kumari jembidang agiba noksa angur.

Mokokchung, April 18 (TYO): April 18 ya India temzüng yanglur rongnung tongtisang Dr. B.R Ambedkar asoba anogo lir. Pa küm 125 ajungba anogo bilemtetba den külemi National Panchayat Day (NPD) sentong India linük ajunga nung amungba den Mokokchung nunga district level sentong ka ADC planning conference hall nung ayongzüka mungogo.
Iba sentong nung Mokokchung D.C Sushil Kumar Patel Kumar (IAS)-i anir par külem yimsüsür (administrator)-tem den department balala nungi tekolak pur, block ketdangsertem aser yimtak yimtsüng nungi VDB aser putu yimsüsürtem adenshia linük temzüng yanglusang Dr. B.R. Ambedkar nem akhüm tetushi agütsüba den Panchayat anogo amungba temaitsü ajaki ochi shia inyaktsü tenangzükba ka agiogo.
Tanü iba sentong nung Mokokchung D.C Sushil Kumar Patel (IAS) menden liasü aser paisa Dr. B.R Ambedkar bilemteta pa nem akhüm tetushi aser konang nüngsang agüja pa (Ambedkar) indang noksa nung narozük ka ilokja yutsü.
Kasa sentong nung Dr. Ambedkar taküm otsü tatsüka Watsü Mungdang tir, Moachilai ashi aser India temzüng nung Panchayat züngokba tongtibang indang Mokokchung ADC, Rajesh IAS-i shia liasü. Iba den DRDA Project Director, Liboni-i central sentong MGNREGA, IAY aser NRLM indang teratet aser inyakyim ashi. Mokokchung District Welfare Officer Bendangkokbaia central sentong SNP/NSAP indang inyakyimtem lemsatep.
Mokokchung district SBM chairman, M. Bendangnükshi Longkumi Swachh Brarat Mission (SBM) maparen aser nükjidong ashi. Ano Er. Chubatoshi (EE NH PWD Mokokchung) aser Er. Yanger Pongen (EE PHED Mokokchung) tenatia mapang tatsütsü agia tepela o den tayongzükba o tulu bener arua telok tesentepertem ajungmesoa liasü.