N Korea-i 5 buba nuclear oset tendangtsü sentong renemer: Park

Seoul, April 18 (Agencies): North Korea-i par nuclear osettsüset tendangba sentong 5 buba agitsü asoshi renemshiba osang angazükba olen ka South Korea Tir, Park Geun-hye-i tanü, Hombar nü metetdaktsüogo.

Park-i par tongti ketdangsertem den tanü ajurutepa senden amendang iba olenji metetdakja liasü.

“N Korea-i alimai par linük anema benokba tenokdangbaren anema inyaka aser par mitkar tashi tuluba kümdaktsütsü nükjidong nung par 5 buba nuclear osettsüset tendangtsü terenemshiba agiba osang angazükogo,” ta Park-i tanü lemsatep.

Alima ashi mangai, N Korea-i par 4 buba tongpang nung amshitsü nuclear osettsüset tendangba maparen taküm, 2016 küm tetenzüklen agiba yong alima tashi abenba linüktemi Pyongyang anema tenokdangba sentong tasen benokshiogo.

Ajisüaka, Pyongyang-i par nuclear osettsüset tendangtsü terenemshitsü sentongji koma agi iba osangbo Park-i memetetdaktsüi lir.

N Korea lenisang, Kim Jong Un-i tongpang nung amshitsü warhead bentetba nuclear aser ballistic missile tendangtsü ozüng par mitkar lenirtem nem taoba March ita agütsüba osang angazükba sülen N Korea-i par 5 buba nuclear tongpang osettsüset tendangtsü sentong renemer ta bilema, alimai par linük dak temulung malemtsü tenzükogo.

N Korea northeast tsütsülen, Punggye-ri nuclear tendangdak mitkar sentongtem taoba mapang nungi tang tesashiba agiba osang ka S Korea aser US ketdangsertemi bushitetba osang ka S Korea sorkari ketdang asüba Yonhap news agency-ia tanü metetdaktsüogo.

Ano, Pyongyang anüdoklentip tsütsülensa tentetba Nyongbyon nuclear osettsüset yangludaka tongpang nung amshitsü nuclear bomb yanglutsü nung amshiba plutonium oset timba yanglutsü tenzükba noksatem satellite ajanga agiba osang ka US sorkari taoba Hokolbar nü metetdakja liasü.

N Korea-i par 5 buba nuclear tongpang osettsüset takok ngua tendangba ajanga par scientist-temi long-range missile amshia, US tonga kadoktetba tongpang nung amshitsü warhead yanglutettsü ta nuclear bomb yanglur alima mongintemia metetdaktsüogo.

Ano külen, N Korea tentetsang, asür Kim Il Sung asoba anogo bilemtetba benjungmong den sentaktepa, Pyongyang-i par nuclear missile ka tan hopta tetenzüklena tendanga kadoktsü merang saka kasaji tamakok nung tembanga liasü.