Dipa Rio Olympics nung shilem agitsü jenjang angur 1 buba Gymnast akümer

Rio de Janeiro, April 18 (Agencies): India’er tetsür gymnast, Dipa Karmakar-i Rio Olympics nung shilem agitsü jenjang angur mezüngbuba India tsür küma otsü tasen yangluogo.
Brazil kübok Rio nung ayonga agiba tatembangba Qualifier & Olympic Test Event kübok tetsür artistic shilem nung 9 buba jenjang ngua, Dipa-i taküm August ita asayatsü ayongba Olympics nung India tenüng nung shilem agitsü jenjangji angu.
Arishi küm 22 tain Dipa-i ajak agi points 52.698 ngua Olympics nung shilem agitsü jenjangji angur lir.
Tripura tsürla, Dipa ya Olympics nung shilem agitsü jenjang angur mezüngbuba India’er tetsür gymnast akümba den külemi, küm 52 tsüngda nung Olympics nung shilem agitsü jenjang angur mezüngbuba India’er gymnast akümer lir.
India nunger gymnast 2-i 1952, 3-i 1956 aser 6-i 1964 küm Olympics nung shilem agitsü jenjang anguba sülenbo Dipa-i tan mezüngsüa India tenüng nung Olympics nung shilem agitsü jenjang angur lir.
“Rio nung agiba Gymnastics Test Event kübok tetsür Qualification Competition nung takok ngua shilem agiba sülen Dipa individual shilem nung Olympics nung shilem agitsü jenjang angur tenüng tarensen nung densemogo,” ta International Gymnastics Federation (FIG)-i osang jangjashitsü.
Rio Olympics nung shilem agitsü jenjang angur tetsür artistic gymnast rong Dipa 79 buba jenjang nung aliba osanga jangjaogo.
Dipa-i 2014 küm Glasgow nung agiba Commwealth Games nunga bronze medal agizüka India’er tetsür gymnast rong nung medal agizüker mezüngbuba gymnast küma otsü yangluba den külemi, yaküm November ita agiba World Championships final  nunga shilem agitsü jenjang angur India’er mezüngbuba tetsür gymnast küma liasü.