Actress Doris Roberts arishi küm 90 nung süogo

April 19, 2016 : TV nung yokba “Everybody Loves Raymond” otsü nung kanga dang taremzük tetsü, Marie Barone ama shilem agila Doris Roberts Süogo, ta “Everybody Loves Raymond” nungi otongdar kati metetdaktsü. La arishi küm 90 liasü.

Lai Ray Romano tettsü ama shilem agia liasü aser film nungsa kinungbo adianu chir kati la kanga amzüka liasü. Iba shilemji Patricia Heaton-i agi.

Iba film ajanga la Emmy aser Screen Actors Guild award tem angu aser Emmy atema telemsa asem nung tenüng benoka lisü.

“Actress tajung ka teti atema mali kümogo. “Everybody Loves Raymond” TV otsü nung kettsü tanutsü ama kanga junga shilem agila Doris Roberts ya actress mongin rongnung ka liasü aser ni la dang nungi aika angazükogo. Lai ajak peladaktsü aser jangratema liogo,” ta Patricia Heaton-i twitter ajanga lemsatep.

Iba otsü nung Madylin Sweeten-i Romano’er jala ama shilem agia liasü aser lai Roberts den külemi nokdaker tangokba noksa ka twitter nung lemsatep.

Asür Roberts-i akümliba mapang küm 60 shi TV shows aser film aika nung shilem agiogo.

Lai ano 1983 küm “St. Elsewhere” drama film ka nung kanga junga shilem agiba ajanga Emmy award ka angu.

“Asenok den Doris Roberts küm 90 dak tema alitsü maotsüba atema Tsüngrem tenüng asanger. Lai asenok menüa toktsür iba lima nungi pilaogo. Tembar tajung na asü lenten ajanga aodang junga dang oangma,” ta 2012 küm “Madea’s Witness Protection” film nung Roberts direct asür Tyler Perry-i Facebook nung lemsatep.

1976 küm “All in the Family” film produce asüsang Norman Lear-i, “Lai ni kanga peladaktsüogo aser ni la dang ibaji joko kodanga meküpzüktettsü,” ta twitter ajanga lemsatepogo.

Roberts-i 1950s mapang nungi acting asütsü tenzük aser TV atema “Naked City,” “Ben Casey” aser “The Defenders” otsütem nung kanga takok ngua shilem agi.

1961 nung lai mezüng shilem agiba film “Something Wild” sülen film 36 dak tema nung shilem agia lir. Lai nüngtugu film “The Taking of Pelham One Two Three” aser “National Lampoon’s Christmas Vacation” tem nunga shilem agia lir.

Roberts-i TV atema “Mary Tyler Moore,” “Fantasy Island,” “The Love Boat” aser “Murder, She Wrote” otsütem nunga shilem tilala agia lir.