Taliban teloki nisung 30 shi tepset; 300 dak tema yirutsü

Taliban telungpur teloki Afghanistan yimtiba, Kabul nung pokshiba lendong ka atalokdaktsüba sülen Afghan mitkartemi lendong atalokdak duty nokdaka aliba noksa nung angur. (Kabul, April 19)

 Kabul, April 19 (Agencies): Taliban telungpurtemi Afghanistan yimtiba, Kabul nung bomb pokdaktsüba den külemi, prangpong injang kalokja tanü, Mongolbar nü lendong atalokdaktsüogo.

Peisasa pokseta asütsü mulungteter telungpur kati pokshiba oset alenokba gari ka anir arua kasaji Afghan intelligence agency office ki kimalen tanep 9:00 ako meta pokdakja lendong ataloktsütsü tezüngzükba osang jangjaogo.

“Tanep pokdaktsüba gari nung pokshitsü oset seret noklang ishika taret alenokba osang bushitetogo. Sorkar miktartemi ghonda ishika tongpang raraba sülen tanü amaker ajunga tepsetba osanga jangjaogo,” ta Afghanistan Interior Ministry otongdar, Sediq Siddiqi-i osang jangjashitsü.

“Tanep atalokdaktsüba lendong nung ishiba agi nisung 30 shi tepsetba aser nisung 300 dak tema yiruba osang tang tashi nung jangjaogo,” ta pai shisem.

“Tanü lendong atalokdaktsüba maparenji lapi maparen lir aser lendong atalokdaktsür ajunga kanga sashia aitsür,” ta Afghanistan Tir, Ashraf Ghani-ia metetdaktsüogo.

Tanü lendongji par teloki atalokdaktsü ta shia, Taliban telok otongdar, Zabihullah Mujahid-i tanü lendong atalokdaktsüba atema tenüng agia metetdaktsü.

“Tanü lendong atalokdaktsüba ajanga Taliban telungpurtemi Afghan sorkar mitkartem den tongpang raradak ajuruteptsü tsüboba kuli sayur,” ta shia, North Atlantic Treaty Organization (NATO)-i Afghanistan nung tentetba Resolute Support Mission (RSM) nung lenir, US General, John Nicholson-ia tanü lendong atalokdaktsüba maparen aitsüba olen ka metetdaktsü.