N Korea-i 5 buba nuclear tetendangbaren magitsüla: US & Asia

Seoul, April 19 (Agencies): United States, Japan aser South Korea nungi tongti ketdangsertemi Seoul yimti nung senden ka tanü, Mongolbar nü amenba sülen North Korea-i par tongpang nung amshitsü nuclear osettsüset tendangtsü sentong 5 buba magitsü amokmerenogo.

N Korea-i United Nations Security Council (UNSC)-i agiba telemtetba anema inyaka, par nuclear osettsüset tendangba maparen inyakba den sentakba onük benoka jembitsü nükjidong nung tanü sendenji ayonga amenba osang jangjaogo.

Pyongyang-i par 5 buba nuclear tongpang oset tendangtsü renemshiba osang lazükba sülen US Deputy Secretary of State, Tony Blinken; S Korea Vice Foreign Minister, Lim Sung-nam aser Japan Vice Foreign Minister, Akitaka Saiki nungeri tanü sendenji mena liasü.

“Pyongyang-i par nuclear aser missile osettsüset tendangtsü maparen maneni inyakra, par linük anema tenokdangba sentongtem maneni benoktsü asoshi UNSC-i taoba March ita agiba 2270 buba telemtetba nung densema lir,” ta Lim-i metetdaktsü.

N Korea’er nuclear osettsüset tendangdak, Punggye-ri nung taoba mapang nungi tang terenemshiba agiba maparen timba inyakba osang angazükba sülen par linüki 5 buba tongpang nung amshitsü nuclear aser ballistic missile tendangtsü renemeshir asütsü ta S Korea Tir, Park Guen-Hye-ia yashi alima dang sangokja liasü.

US tonga kadoktetba nuclear warhead bentetba missile maneni tendangtsü asoshi N Korea lenisang, Kim Jong Un-ia taoba March ita ozüng agütsüba osanga bushiteta lir.

“N Korea-i Iran, Cuba aser Myanmar nunger nungi tatishitsü agia, par nuclear mapatong anena terenlok alitsü mera agitsü ajungshir,” ta Blinken-ia metetdaktsü.

Ano külen, N Korea’er nuclear mapatong anentsütsü maparen nung par linük pusemer, Russia aser China tongti shilem agitsü tayongzükba olen ka tanü lenirtemi sangokja liasü.