India Army tulubai Kashmir lendong atalokba tesem semdang

Srinagar, April 19 (Agencies) : India sepai rongnung tekolakba General Dalbir Singh Suhag-i Mongulbarnü Kupwara district, Kashmir semdangogo. Iba district nung taoba hopta sepai aser telungpur na kahtepdang nisung pongu kahseta liasü.

Sepai otongdar Colonel N.N. Joshi-i, iba tesem semdangdang General Dalbir Singh Suhag-i Kashmir Valley nung security jenjang telung tonga ia reprangdangogo, ta IANS osangbenertem dang ashi.

Dalbir Singh-i iba tesem semdangtsü aodang Northern Army commander, Lieutenant General D.S. Hooda-i meina ao aser iba mapang parnoki Srinagar nung aliba sepai camp dena semdang.

“Iba sepai camp nung Commander, Lieutenant General Satish Dua-i Dalbir dang security jenjang koma lir aser lendong atema parnok koma tashi ita renema lir item pokji o lemsatepa liasü,” ta Joshi-i ashi.

Otongdari ashiba agi, Dalbir Singh dang ano Handwara, Kashmir nung anogo ishika tejakdang lungkak tesashi aitba osanga shiogo.

General Dalbir Singh densa Line of Control (LoC) tsütsü tang tensa indanga lemsatepogo.

Parnok den jembiba mapang Dalbir Singh-i, LoC nung aliba sepaitem teti terenemba tulu nung aliba atema kanga temulung asür, ta ashi.