Apok-i Molungyimsen nung ‘Pilgrim’s Haven’ lung azüngtsü

April 19, 2016 nü Clark suspension bridge, Molungyimsen nung Pilgrim Rest Camp lung azüngba sentong nung Tourism Parliamentary Secretary, Wb. C Apok Jamir (tiyongtsü nung) aser pa kinungtsü den Ungma aser Molungyimsen nungi lennirtem aser ketdangsertem külemi agiba noksa ka angur.

Molungyimsen, April 19 (TYO) : Tourism Parliamentary Secretary, Wb. C Apok Jamir-i Mongulbarnü Molungyimsen nung Clark’s suspension bridge nung Pilgrim Rest Camp ka yanglutsü atema lung azünga yutsüogo.

Iba Camp dang Pilgrim’s Haven ta ajatsü aser tanü Molungyimsen o Ungma yimtsüngtem nungi lenirtem aser village council züngsemtem adenshia lia Wb. C. Apok-i lung azünga yutsü.

Tanü tsüngsang mejungaka Parliamentary secretary Wb. Apok aser pa meinertemi timtem arema Milak ayong temdanga yangluba Clark’er apu tonga arua shilem agi.

2011 küm state sorkari Molungyimsen ya Naga Heritage village ta tenüng jaloktsüogo aser iba yim semdangi arurtem anenzüktsü atema ‘Pilgrim’s Rest Camp’ nung ki kar yanglutsü. Iba mapa ya Ao Senden tir Wb. Imolemba Jamir-i ketdangsüa inyaktsü aser Tourism Department, Nagaland-ia rest camp nung kiojen kar yanglutsü.

Tanü sentong nung Parliamentary Secretary, Wb. C Apok-i tongti tesemdanger o jembidang, pa Molungyimsen-i arubaji temoatsü ka ama züngshir ta ashi.

“Molungyimsen indang putiotsü ka lir aser ibaji Aor tesemtemi dang masü saka Naga nunger tesem balalai Osangtajung prokba lir. Anungji, iba yimtsüng nungi kechi mapasa tenzükdir, item ajak nung Tsüngrem temoatsü denang ta ni sarasademer” ta paisa ashi.

Tourism Department-i teti Molungyimsen yimtsüng den yaritepa arur aser terenlok lia mapa inyakogo. Iba Pilgrim Rest House ya takok ngua inyaktettsü atema tourism department den nisung ajaki yariteptsü ayongzüker, ta Wb. Apok-isa metetdaktsü.

Tanü agiba sentong nung mendenji Molungyimsen Senso Mungdang tir, A Taku Longkumer liasü aser Ungma Baptist Arogo sannüker, Rev Dr Noklen Longkumer-i meshiteta sarasadem.

Sentong nungsa Ao Senden Tir, Imolemba Jamir-i o jembi aser Ungma o Molungyimsen yimtsüngtem nungi lennirtem den district administration nungia ketdangsertem iba sentong nung aden.