Lenmang yanglupeter telok

Kolkota, Delhi aser Mumbai tashi maoyonga Nagaland nungi Nagoan ajanga Guwahati aser Shillong tashi gari nung odangra, India nung National Highway (NH) ta asüba lenmang ya komala lenmang ka dang ajar-ar, ibaji kanga junga angutsü. Ano külen India nung NH kongsa shitak yanglua maliar, ibaji ngunüra Assam len nungi Nagaland-i arunung kanga junga angutsü. Aji oda, kasa National Highway-sa süaka Nagaland asoshibo lenmang tasazük tilaba asazüktsü asü (?) ta bilemtsüsa tanga state nung yanglua akaba NH lenmangtem den medemdangra, Nagaland nung yanglua akaba NH lenmangtem yabo temedemdangtsüla masü kangasa ilara angur. Aji oda, Nagaland nung alir Naga nungerbo tangari gari lenmang ilarepa yanglua toktsüba mezüngmeshi tia nungi dena nüchiso nüngdaker. Ano, ajak dang tezüdangtsü aser tejashitsü kaji Nagaland nung SARDP sentong kübok Nagaland nung gari ana sademsadema tsüitepteta (two lane) yanglutsü asoshi lenmang yanglur telok ka tenüng agi Mayatas & Gayatri nem lenmang pezü yanglutsü asoshi lemzüktsü. Item lenmangtemji Longleng – Changtongya, Mon-Tamlu- Merangkong, Phek- Pfutsero aser Zunheboto- Chakhabama lenmangtem liasü. Ajisüaka, tang item lenmangtemji Mayatas & Gayatri telok jagi inyakper yuja lir. Parnoki item lenmangtem tupeter toktsüba agi tsünglu marudang auyi aser tsünglu arudang lishi agi tesenzü majung nübortem kanga timtemdagi. Ajisüaka, khen khen Nagaland Contractors’ & Suppliers’ Union purtemi ola adokba dak alaka iba ama lenmang tupeter yutsüba telok anema shingaia ola madoker. Ashi, kari danga parnoki lenmang yanglupeter toktsüba ajanga nübortem takoksa anguba yari temenok meshia okadak ken o benok asübo jungla ta tang tashi bilemer. Atangji, yaküm 2015 küm khenbo Nagaland sorkaria Delhi tashi oagi tebang ia jembiba agi, Nagaland nung yanglupeter toktsüba lenmang pezüpronglaji ita ishika tsüngda obendangeri dena repranga yangludaktsütsü ama telemtetba agütsüba osang angashiogo. Ajisüaka, tang tashi iba o toa mapa küma inyakba mangur. Nagaland yabo pei sünütsü asüba lima, anungji lenmang yanglutsü contract mapa tajung agütsüyonga, sen agizüka agirbo, yanglunüa yanglutsü aser meyanglunüra meyanglutsütsü, pei mulung, shingaia kechiba (?) ta mashitsü. Aji oda, Nagaland nungbo mapa kanga junga inyaktsüra Naga nungertemi parnokjibo matumalem nisung amato bilemtsü. Iba jaklaji meteta Mayatas & Gayatri telokia lenmang pezü jungjunga tusar yutsüogo. Tanga state nung asübo temerenshi angutsütsüba agi, Nagaland nungbo lenmang pezü yanglupeter yutsüba atema tepela marem ano parnok telok nemsa Dimapur- Kohima lenmang, ajibo four lane, yanglutsü asoshi sen teimba jenjang mapa agütsüogo. Center sorkari dang masü saka Mayatas aser  Gayatri telok ama kati Naga nunger lir ta mali mezüngmeshiba mapaji aji asütsü. Ashiko, iba atema Nagaland state sorkaribo parnok nem tenüngsang agütsür asütsüa akok. Asenok taküm tiaji iba tashiji lir aser asenok tekolok agi iba tashiji dang atonger. Iba amaisa asenok alinungbo telok kati dang masü saka ajaki asenok ajemshitsü. Tangbo lenmang yangluypetyyonga tanemtanemi gari nung jajar saka kenlirbo akhi ama asenok ya gari lenmang yanglusaba agi pei khu pei kolak nung bener tetsüng agi jajatsü. Atangji, asenoka terabo nisung mesüker ta asütsüsa, Naga nunger tia ajung NCSU ajanga Matayas aser Gayatri teloki lenmang pezü yanglupeter alibaji merenem tashibo Nagaland nung parnok nem tanga mapa meinydaktsütsüla ta takangba agütsüogo. Iba olaji manendaktsüi, Naga nungertema taküm lir ta asütsüsa, Naga nunger lokti telongjem, tribal hoho aser kaketshir telongjemtemi NCSU pu sema ola adoktsüla. Iba amaji ola adoka asenok temeten bushi nung dang asüng asenoka tanga state nung ama gari lenmang tajung nung jajatsü.