Scout & Guide ajanga meimchir meimtsü tesayuba agütsür : Khriehu

April 20, 2016 nü Parliamentary Secretary, Khriehu Liezietsu Nagaland Bharat Scouts & Guides nung Life Member ama züngsemdang agiba noksa angur.

Kohima, April 20 (TYO) : Scouts aser guides maparen ajanga medemer yimtepba, mapa meranga inyakba, putepa aliba aser meimchir atema aria bilemtsüba tesayubatem agütsür, ta Youth Resources & Sports, State Lotteries, Music Task Force Parliamentary Secretary, Khriehu Liezietsu-i ashi.

“Scout maparen nung community service, integration camps, exchange programs, outdoor activities amala ayongzüka agiba ajanga linük aser asen lokti renlokdaktsür” ta Khriehu-i ashi.

Bodbarnü Nagaland State Bharat Scouts & Guides (NSBSG) Life Members Meet den NSBSG golden jubilee lung azünga ayuba sentong nung tongti tesemdanger o jembidang Khriehu-i iba onük jembi.

Khriehu ya NSBSG nunga President lir aser paisa ashiba agi, Bharat Scouts & Guides nung züngsem million 5.5 den timba lir aser iba ya linük nung non-governmental organization tulutem rongnung ka lir.

1967 küm tentetba nungi NSBSG-i kechisarena ajaklen terenlok ngua arur aser NSBSG-i Nagaland nung lanur nem tesayuba agütsüba dang masü saka aria bilemtsüba, linük meimtsüba, tetsü akhümtsübutsü, ochishitsü aser ajemalua alitsü tesayuba tajungtem agütsür, ta paisa ashi.

NSBSG hon jubileemung tenzükba den külemi züngsemtemi maneni meranga inyaktsüla, ta Parliamentary Secretary-isa ayongzük.

Tanü Bayavü nung aliba headquarter complex nung Khriehu-isa NSBSG golden jubilee ki yanglutsü atema lung azünga yutsü.

Sentong nung Chief Commissioner NSBSG aser ex-MP, Khyomo Lotha-ia o jembidang, North East region nungi Presidential aser Governor Certificate teimtiba angubaji NSBSG lir ta ashi.

Sentong nung mendenji Life Member & State Treasurer K. Neibou Sekhose liasü, Baptist Mission Church sannüker Rev. Neikhrienyü-i temoatsü meshia sarasadem, State Commissioner (Scout) P. Atuo Mezhür-i tesentepertem pela agizük, Dr. Joyce Zinyü-i Life Member tem tenüng nung o jembi aser Life Member & State Secretary (Scout) John Tochimong-i anküp tepela o jembi.

Tanü Parliamentary Secretary Khriehu dena nisung 10 tashi NSBSG nung Life Member ta züngok.