Shisaluyimertem shisalen shitakba bushir

Dimapur, April 20 (TYO) : Tanü putu nung kaketreju balala nung azünger kaketshirtem shiai pei dak aketba sempet aser tejangraba meteta kaketshisatsü bushia mapa shitak shimteta inyaktsü atema shisalen bushiba sentong ka Akhoya Shisaluyimertem Telongjemi GCYM Dimapur nung akatsü asoshi renema lir.
Iba sentong ya April 26 nungi 28 tashi akatsü aser shisalen  sayurtemji Wb.Vishal IPS, Suman IFS , Shivam Verma IAS aser Rev. R.Meren Jamir nungertem alitsü.
Ano, iba kasa sentong nung kaketshirtem Tsüngrem den tanüla nung renemshiba mapang nikongdang shia alitsü. Iba sentong nung Tsüngrem o jembirji Rev.Tiyong Kichu alitsü. Pai jembitsüba onükji Tsüngrem nükjidong angatetba, Tsüngrem nem anidaktsüba aser Tsüngrem nükjidong atalokdaktsüba taküm indang asütsü.
Iba sentong nungsa mapa angutsüba lenmangtem aser  mapa shitak shimtetba indang kaketshirtem den sensaksemba sentong ka akatsü. Iba sentong nung shisalen teyurtemji Wb.Limaaküm Jamir, NPS; Dr.Maongkala Longchar, Assistant Professor, Wt. Sharon Longchari, NCS; Wt. Rongsenmenla NCS aser Er.Alemtushi Imsong nungertem asütsü.
Item sentongtem nung onirtemji Wb.Aochuba IFS, Wb.Zulutemsü, Dr.Wapang, Wb.Onen Jamir aser Wb. Aküm Jamir nungertem alitsü aser mezüng sentep sentong nung ketdangsertemji Wb.Shilu Jamir o Wt.Watinaro Lkr na asütsü.
Iba sentong ya taküm 2016 küm Akhoya Shisaluyimertem Telongjem tenzüker küm 75 ajungba Platinum Jubilee tenüng nung ayongzüka akar aser sentong tepiyong achiajemtsü ajak Dimapur Akhoya Fellowship-i agütsür.
Iba sentong nung adentsü purtem ajak April 26, 2016 nikongdang 2:00 ako tashi nungbosa sentong akadak GCYM Sovima, Dimapur atongtsüla ta AST lenirtemi metetdaktsüogo.