Govt. Polytechnic Kohima nung Earth Day benjung amung

Kohima, April 20 (TYO) : Government Polytechnic Kohima (GPK)-i Key Foundation, New Delhi aser Ministry of Earth Sciences, Government of India den yaritepa Bodbarnü Earth Day 2016 nüngtem nung sentong ka ayongzüka amung.
Iba sentongji “Caring Mother Earth” omen nung ajemdaker Government Polytechnic Kohima (GPK) nung ayongzüka agi.
“Asen lipoküm kanga melenshir aser asenoki asen lipoküm raksatsür. Tarutsü putu atema tanü asenoki asen lipoküm kümzüka aser wazüka ayutsüla” ta tanü tongti tesemdanger, School Education & SCERT Commissioner & Secretary, F. P. Solo-i ashi.
“Meimchirtemi mapa inyakba ajanga tsüngsang-mopung melenshir. Anungji asenoki asen lipoküm wazüka ayutsü atema inyakyimtem melenshitsüla. Asenoki asen libaliro aser yimyatsüyatem melenshitsüla, kechiyong iba jagi asen lipoküm nung temelenshi bener arutsü” ta paisa ashi.
F.P Solo-isa, shi kanga machitsü saka mozü medeni tsünütetba chiyungtsü, aonsotsü, aser süngjanglijangtem achitsü, temang arakzüa mapa inyaktsü, nija gari nung mesenzüi public transport system nung senzütsü, süngdong atemtsü aser jana shisa kaa endoktsü tebilembatem lemsatep.
“Asenoki asen tebilemtsü khurettem angatetdi aser asen lipoküm jenjang tajungba kümdaktsütsü merangdi. Earth Day ajanga asenoki asen lipoküm wazüka ayutsü tebilemtsü khuret bilemtetdaktsür” ta paisa shisem.
Sentong GPK Principal Vipulhou Lhoungu-i o jembidang, Earth Day amungba ya alima aser lipoküm atema tenüngsang agütsütsü aser pollution indang temetettsü sangoktsütsü atema lir ta ashi.
“Küm shia April 22 nü Earth Day amunger, ajisüaka Government Polytechnic Kohima (GPK)-i osang meteta lidaktsütsü nükjidong nung anogo ananü jelia iba sentong amunger,” ta paisa ashi.
Iba anogomung tenüng nung Caring Mother Earth omen nung ajemdaker slogan & drawing competition aser Science & Technology nung Quiz competition agia liasü.
Tetoktepba balala nung takok angurtem:
SLOGAN: 1st – Nukedu Dawhuo, Kohima College; 2nd – Thonhii Movi, Kohima College; 3rd – Wemekrie, Mount Hermon Higher Secondary School; 4th – Atsulem, Govt. Polytechnic Kohima.
DRAWING: 1st – Bendangwatila Pongen, Don Bosco Higher Secondary School; 2nd – Tiyangsen Lemtur, G. Rio School; 3rd – Neitseizolie, Christ King Higher Secondary School; 4th – Rokolhou Sietuo, Kohima College
QUIZ WINNER: Group B: Anikita Priyadarshini- Mount Hermon Higher Secondary School, Tovika Sumi- Government Polytechnic, Thsekulni Thopi- Mount Hermon Higher Secondary School, Vilanyii Vincent Chadi- Don Bosco Higher Secondary School &Ruben Gurung- Vinyuzo School.