Syria nung meraratepba ajanga dang yimjung litettsü: Stoltenberg

Ankara, April 21 (Agencies): Syria nung mangatettep adoka aliba teloktem rong nung meraratsü tezüngzüktep agia kasaji mapa küma inyakba ajanga dang par linük nung yimji yimjung litettsü ta North Atlantic Treaty Organization (NATO) lenisang, Jens Stoltenberg-i tanü, Brehostibar nü metetdaktsüogo.

“Syria nung tongpang rarartem rong nung yimjung tezüngzüktep agir joko ita 2 shi süir. Ajisüaka, parnoki nangzüktepba ama asangsang nung meinyaki tangasa tongpang raraba ajanga parnoki tangatettep kati maruteti, par Syria nung yimji yimjung tensa bener marutsüteti lir,” ta pai ashi.

Ajisüaka, Syria sorkar aser sorkar anemertemi nangzüktepba ama asangsang nung par tongpang rarabaren anenra, parnoki Syria nung yimji yimjung tia bener arutsütettsü ta Stoltenberg-i sangoktsü.

Syria Tir, Bashar al-Assad-i aniba Syria sorkar aser sorkar anemertem nati taküm February ita nungi tenzüka yimjung tezüngzüktep agia lir saka par telok anapronglai par tenangzükbaren raksa, mapang shia amakba maparen inyaka tensa mejungi kümdaktsüba osang bushiteta lir.

Stoltenberg-i Turkey kübok Ankara nung Turkey Foreign Minister, Mevlut Cavusoglu den senden ka amenba sülen tenati osangbener den aroki ajurutepdang iba olenji metetdaktsü.

“Russia-i par mitkar aser tongpang raratsü osettsüset ajunga Syria nungi anitettsü renemba osang taoba March ita sangokjaka, Russia sorkari par mitkar aser tongpang raratsü osettsüset tangasa Syria nung yuja aliba osang bushiteta lir,” ta Stoltenberg-isa metetdaktsü.

Ano, Turkey-i par Incirlik Airbase amshidakja, US-i aniba alima teloktep mitkartemi Islamic State (IS) kiralongrartem anema rarabaren nung amalitepa yaritepba atema pelaba olen ka Stoltenberg-i lemsatepa liasü.