Middle East tensa jungdaktsütsü atema US o GCC lungjema lir: Obama

Riyadh, April 21 (Agencies): Alima tesem balala talisa, Middle East nung lendongtsüdong kanga sashia atalokdaktsüba Islamic State (IS) kiralongrar telok meshimeshia samatsütsü aser Middle East ajunga nung tensa tajungba kümdaktsütsü atema US aser Gulf Cooperation Council (GCC) na lungjema aliba olen ka US Tir, Barack Obama-i tanü, Brehostibar nü sangoktsüogo.

US-i GCC aser par tentet pusemertem anema nokdaker ajunga nokdangtsü renema aliba olen ka Obama-isa metetdakja liasü.

“IS telok meshimeshia samatsütsü maparen nung ozü US aser GCC lenirtem lungjema lir,” ta Obama-i nenshia ashi.

Obama-i Saudi Arabia kübok Riyadh nung tang temendak GCC senden nung shilem agia o jembidang tanü iba olenji sangoktsü.

GCC nung shilem agir lenir 6 den Syira, Yemen, Iraq aser Libya nunger nung mangatettep adoka tongpang raraba ajanga yimtenren tia makmakshimakdaktsüba onüka Obama-i benoka jembiba osang jangjaogo.

IS aser al-Qaeda telok na samatsütsü aser Iran-i Middle East nung tensa mejungi kümdaktsütsüsa maparen inyakba nokdangtsü onüktema parnoki tanü benoka jembi.

Mangatettep tulu adoka tensa mejungi alidak, Yemen aser Syria na nung yimtenren tebentetbaren agia, democracy yimsüsütsü yimya benoka benshitsü asoshi US-i ajungshiba osanga angazükogo.

Obama-i yashi, Bodbar nüa Saudi chuba, King Salman den ajurutepa tenati ghonda 2 dak tema agia senden mena liasü.

GCC ya Saudi Arabia, Kuwait, United Arab Emirates, Qatar, Bahrain aser Oman linüktemi aroki lungjemer tentetba tongti tentet ka lir.

Obama-i tanü GCC senden nung shilem agiba sülen maneni Britain-i oa Britain Ato Kilonser, David Cameroon den ajuruteptsü sentong renema lir.

Obama-i Cameroon den kiralongrar anema raratsü, Europe nung jenoka alir refugee nisungtem aser alima rongsenren jenjang mejungi akümba den sentakba onüktem benoka jembitsü sentong lir.