Naga People’s Front Office tasen ka semzük

Kohima, April 21 (TYO) : Dzüvürü, (Mohankhola) Kohima nung 14th aser 15th Southern Angami A/C Naga People’s Front Office tasen ka April 19, 2016 nü 11:00 ako nung Member of Parliament aser NPF Central, Secretary General K. G. Keneye tongti tesemdangersüa semzükogo, ta sangdong ka ajanga metetdaktsü.
Iba sentong 15th Southern Angami A/C nung Tir Zekrol Soleho-i ani aser Viswema Baptist Arogo nung Pastor Rev. Hosato Kiso-i sentong tenzüka sarasadem.
Iba sülen 14th Southern Angami A/C nung Tatong Tir Keduvito Kirha-i tarurtem pela agizükba sülen Jubilant Tribal Choir-i ken ka aten.
Sentong nung Kohima Division Tir Guonei-u Sirie-ia o tatsüka jembi.
Tongti tesemdangeri o jembiba mapang party züngsemtem dang yimten atema parnok teinyaktsütem aser yimjung inyakyim tsütsü ano tali bendanga agüja inyaktsü ajungshi.
Kenye-i, party nung telungjem aser tangatettep kanga nüngdak aser ibaji ajanga sorkar inyakyim nung party omen jungkai adoka sayutettsü, ta ashi.
Tang yimjung atema jembiba nung temelenshi tajung ka marura 2018 küm agitsü aliba General Election atema kanga junga renema alitsüla, ta pai ashi.
Sentong tembanga Youth Wing 14th Southern Angami A/C nung Tir Teputon Kirha-i tepela o jembi aser iba sülen office tasen semzükba nüngtem nung benjung chiyungtep.