Thailand-i mitkartem nem tashi tali magütsütsüla: Hussein

United Nations, April 22 (Agencies): Thailand sorkari mitkartem nem tashi tali magütsütsü tajungshiba olen ka United Nations (UN)-i metetdaktsüogo.

“Thailand-i mitkartem nem tashi tali agütsübaren ajemtsütsü aser mitkartemi taküm August ita agizükdaktsütsü asoshi renemba linük temzüng ozüng küma agizükba jakdang nüburtem rong nung linük temzüng tasenba den sentakba olemteptsüren agitsü ajungshir,” ta U.N. High Commissioner for Human Rights (UNHCHR), Zeid Ra’ad Al Hussein-i metetdaktsü.

Mitkartemi 2014 küm May ita nungi tenzüka Thailand indang yimsüsütsü tashi agiba sülen par Thailand nung yimtenren telok sendentem agitsü aser osangtsüsang belenshitsüren nokdangba den külemi, lenirtem anema nokdaka ola adokertem anema mitkar okadak ken o benoka parnok merenshiba osang bushiteta lir.

Taoba Thailand mitkar lenisang aser tang Tir menden benoka alisang, Prayuth Chan-ocha-ia sangküm, 2017 küm tom tashi nung election agitsü nangzükba den külemi, par linük nung yimtenren ken o ajunga bentettsütsü tenangzükba agia lir.

Temulung malemba nisungtem jenoka alidak aliba osettsüset pua ayutsü densema, Thailand lenirtemi par mitkartem nem kuli tejangja meliaka, temulung malemer nisungtem pua ayutsü tashi taoba March ita agütsüogo.

Ajisüaka, “Mitkartem nem tashi ulura agütsüba ajanga sorkari aibelenbaren anema nokdakertem ayong ayong ajembanga yutettsü,” ta nübur temeten asoshi nokdakertemi temulung malemba olen ka metetdaktsüogo.

“Mitkartem nem tashi tali agütsüsemba ajanga Thailand nung adokba yimtenren mangatettepbaren mebentettettsü,” ta shia, sorkari mitkartem nem agütsüba tashi agientsü asoshi Hussein-i ajungshiogo.