Vijay Mallya linüki anir arutsü atema inyaktsü: Sorkar

New Delhi, April 22 (Agencies): Shishilembar tetsüti, Vijay Mallya atema jenjang tamajungba kümdar, kechiyong sorkari, pa linüki meyipa anir arutsü atema takoktsü lenmang ajak bushidar, ta metetdaktsüogo.

Enforcement Directorate (ED)-i Mallya bendanglen nungi India linüki anir arutsü mepishiba dak sentakba nung osangbenertemi asüngdangba ka langzüdang External Affairs Ministry otongdar, Vikas Swarup-i, “Onoki mongintem dang nungi shisa agidar,” ta metetdaktsü.

“Pa obendangdaki anir arutsü atema sorkari inyaktsü, tang onoki agency balala dang nungi shisatsü agidar,” ta paisa shisem.

Brihostibarnü ED-i ministry of external affairs (MEA) dang IDBI dang bank sen crore 900 apoba ken o nung Mallya UK nungi anir arutsü atema mepishiogo.

ED-i asemben tashi billionaire, Mallya jaoka liasü, saka item anogo asemprong nung pai parnok matsüngdangi maru. ED-i mepishiba nung ajemdaker Mumbai court kati Mallya anema bail magütsütsü obendang agütsüogo, koba ajanga Interpol-i pa anema ‘red corner notice’ agütsütsü lenmang lapoktsüogo.

State Bank of India (SBI) densema bank tem dang pai sen apoba sentsüh crore 9,000 lir. tamalen pai mapang telemsa ana nung mezüng sen crore 4,400 agütsütsü benoka liasü, aser yashi, Brihostibarnüa Mallya-i Supreme Court (SC) dang pai sen crore 4,400 den ano sen crore 2,468 tali agütsüsemtsü benokogo.

Court-i Mallya dang, pa kodang India-i meyipa arutsü ta asüngdanga lir, ajisüaka iba telangzüba magütsüi pai, Kingfisher Airlines maneni alitsü atema merangba tamakok angu, kechiyong totzü jenjang asakba, saru tali aser tayimtsü gol majungba kulitem ajanga pa den par kibong, UB Group aser Kingfisher Finvest-i sen crore 6,107 takoksa ajuru, ta ashi.